ठाणे, ता. १ (वार्ताहर) : चोरट्याने घरात शिरून १६ हजारांचे चार मोबाईल घेऊन पोबारा केल्याचा गुन्हा नौपाडा पोलिस ठाण्यात नोंद झाला. पोलिस पथकाने सीसी टीव्हीच्या आधारे तीन पथके तयार करून मुंब्रा परिसरातील आरोपी अब्दुल समद नुरमोहम्मद सखानी (वय २७) याला अटक केली. नौपाडा पोलिसांनी आरोपीकडून चार लाख ६६ हजार ५०० रुपयांच्या मुद्देमालासह अटक करून सहा गुन्ह्यांची उकल केली. अटक आरोपी सखानी याला नौपाडा पोलिसांनी सीसी टीव्हीच्या आधारे सापळा रचून ताब्यात घेतले. आरोपीवर नौपाडा पोलिस ठाण्यात चार गुन्हे, कळवा, ठाणेनगर पोलिस ठाण्यात प्रत्येकी एक गुन्हा असे सहा गुन्हे नोंद असल्याची माहिती समोर आली. आरोपीकडून एक लाख ५० हजारांचे ५ मोबाईल, एक लॅपटॉप, एक मोटारसायकल आणि एक बुलेट असा चार लाख ६६ हजार ५०० रुपयांचा मुद्देमाल हस्तगत करण्यात आला.