वाडा, ता. २५ (बातमीदार) : इस्लाम धर्मात पवित्र व महत्त्वपूर्ण समजल्या जाणाऱ्या रमजानच्या रोजांना सुरुवात झाली आहे. बुधवारी (ता. २२) सायंकाळी चंद्रदर्शन न झाल्याने शुक्रवारपासून (ता. २४) रोजे करण्याचा निर्णय हिलाल कमिटीकडून जाहीर करण्यात आला होता. रमजानचे रोजे महिनाभर चालणार आहेत. या कालावधीत सूर्योदयापूर्वीपासून ते सूर्यास्तापर्यंत अन्न, पाणी वर्ज्य असते. त्याचबरोबर सर्व प्रकारची वाईट कृत्ये व संगतीपासून अलिप्त राहण्याचे बंधन असते. रमजान महिन्यामुळे मुस्लिम बांधवात, समाजात उत्सवाचे वातावरण पसरले आहे.