कल्याण, ता. ८ (बातमीदार) : कल्याण पूर्वमधील खड्डेमय रस्त्यांचा प्रश्न सुटणार असून आमदार गणपत गायकवाड यांनी राज्य शासनाकडून सिमेंट रस्त्यासाठी कोट्यवधी रुपयांचा निधी मंजूर करून आणला आहे. त्या कामांच्या भूमिपूजन सोहळ्याचा धडाका सुरू असून कल्याण पूर्व मधील काही भागांत नागरिकांना लवकरच रस्ते चकाचक मिळणार आहेत.
कल्याण पूर्वमधील रस्ते खराब होत होते आणि त्यातून खड्डेमय रस्त्यातून नागरिकांना प्रवास करावा लागत होता. त्यावर तोडगा काढण्यासाठी आमदार गणपत गायकवाड यांच्या प्रयत्नाने मंजूर करण्यात आलेल्या राज्य शासनाच्या विशेष कोट्यवधी रुपयांचा विकास निधीमधून कल्याण पूर्वेतील रस्ते सिमेंट काँक्रिटीकरण करण्यात येणार आहेत. नुकतेच विकास कामाचा भूमिपूजन सोहळा पार पडत असून ही कामे झाल्यास कल्याण पूर्वमधील रस्ते खड्डेमुक्त होणार आहेत.