मुंबई, ता. १६ : लोकसभेच्या निवडणुकीसाठी मुंबई उपनगर जिल्ह्यातील मतदान यंत्रांची पहिली सरमिसळ प्रक्रिया जिल्हा निवडणूक अधिकारी तथा जिल्हाधिकारी राजेंद्र क्षीरसागर यांच्या अध्यक्षतेखाली जिल्हाधिकारी कार्यालयातील सभागृहात मंगळवारी पार पडली. 
लोकसभेच्या निवडणुकीसाठी मुंबई उपनगर जिल्ह्यातील चारही मतदारसंघात २० मे रोजी मतदान प्रक्रिया पार पडणार आहे. या पार्श्वभूमीवर मतदान यंत्रांची प्रथम सरमिसळ आणि मतदान यंत्रे मतदारसंघनिहाय ताब्यात घेण्याबाबतची प्रक्रिया आजपासून सुरू झाली. या वेळी अपर जिल्हाधिकारी मनोज गोहाड, उपजिल्हा निवडणूक अधिकारी तेजस समेळ, उपजिल्हाधिकारी तथा ईव्हीएम व्यवस्थापनाचे समन्वयक अधिकारी संदीप निचित यांच्यासह निवडणूक निर्णय अधिकारी, राजकीय पक्षांचे प्रतिनिधी उपस्थित होते.
क्षीरसागर यांनी सांगितले की, निवडणूक आयोगाच्या निकषानुसार मतदान यंत्रांची सरमिसळ प्रक्रिया संगणकीय पद्धतीने पूर्ण करण्यात आली. सरमिसळ याद्या तयार झाल्या असून विधानसभा मतदारसंघनिहाय बोरिवलीतील राजेंद्रनगर येथील भारतीय अन्न महामंडळाच्या गोदामात मतदान यंत्रे संबंधित विधानसभेचे सहायक निवडणूक निर्णय अधिकारी यांच्या ताब्यात देण्याची प्रक्रिया सुरू होईल. मुंबई उपनगर जिल्ह्यात लोकसभेचे चार, तर एका मतदारसंघाचा अंशत: समावेश आहे. मुंबई उपनगर जिल्ह्यात विधानसभेच्या २६ मतदारसंघांचा समावेश असून सात हजार ३८० मतदान केंद्रे आहेत. त्यासाठी भारत निवडणूक आयोगाच्या निकषाप्रमाणे बॅलेट युनिट ८,८४५, कंट्रोल युनिट ८,८४५, व्हीव्हीपॅटची ९,५८१ एवढी आवश्यकता आहे.