उरण, ता. १७ (वार्ताहर) : श्री रामनवमी उत्सव विविध ठिकाणी मोठ्या उत्साहात साजरा करण्यात आला. या वेळी भाविकांनी आपापल्या कुटुंबासह प्रभू श्रीरामाच्या मंदिरात जाऊन दर्शन घेतले. उरण शहर, चिरनेर, फुंडे, चिर्ले, दिघोडे, खोपटा गावात श्रीरामाची जागृत मंदिरे आहेत. या मंदिरांत दरवर्षी श्री रामनवमी उत्सव मोठ्या उत्साहात साजरा करण्यात येतो. मंदिरात सकाळी ५ वाजता अभिषेक, काकड आरती, कीर्तन, भजन, रामजन्म सोहळ्याचे आयोजन करण्यात आले. रामजन्माचा पाळणा सजवून महिलांनी पाळणा गीत गायिले. उरण तालुक्यातील फुंडे येथील अनेक वर्षे प्रतीक्षेत असलेल्या राम मंदिराचा जीर्णोद्धार तीन दिवस आगोदर करण्यात येऊन श्रीरामाची प्रतिष्ठापना करण्यात आली. तीन दिवस या मंदिरात कीर्तन, भजन, हरिपाठ असे विविध कार्यक्रम पार पडले. सायंकाळी श्री रामाचा पालखी सोहळा पार पडला.