शिक्षणामुळे राष्ट्र समृद्ध होते : विनोद मोहितकर
प्रभादेवी, ता. २७ (बातमीदार) : एखाद्या राष्ट्राची शिक्षण व्यवस्था प्रगल्भ असेल, तर राष्ट्र सुदृढ व समृद्ध होण्यास मदत होते, असे प्रतिपादन राज्याचे तंत्रशिक्षण संचालक डॉ. विनोद मोहितकर यांनी चेंबूर येथे केले. विवेकानंद एज्युकेशन सोसायटीच्या टेक्नॉलॉजी इंजिनियरिंग कॉलेजच्या चाळिसाव्या वर्षपूर्ती सोहळ्याचे आयोजन केले होते, त्या वेळी ते बोलत होते.
या संस्थेस अव्वल दर्जा प्राप्त झालेला असून हा प्रवास चालू ठेवण्यासाठी संस्था कटिबद्ध असल्याचे व्यवस्थापकीय विश्वस्त बलदेव बुलानी यांनी सांगितले.
चाळीस वर्षांची उज्ज्वल कारकीर्द साजरी करण्यासाठी या वर्षी अनेक उपक्रम राबवले जाणार असून शिक्षकांसाठी दोन विशेष अभ्यास वर्गांचे अर्थात फॅकल्टी डेव्हलपमेंट प्रोग्राम आयोजित करण्यात आल्याचे प्राचार्या डॉ. जयलक्ष्मी नायर यांनी सांगितले.
तर इंडियन सोसायटी फॉर टेक्निकल एज्युकेशन अर्थात आयएएसटीईद्वारे प्रमाणित संगणक अभियांत्रिकी विभागातर्फे फुल स्टॅक वेब आणि मोबाईल अप्लिकेशन डेव्हलपमेंट आणि आर्टिफिशियल इंटेलिजन्स आणि डेटा सायन्स विभागातर्फे जनरेटिव्ह एआय हे अभ्यासक्रमही घेतले जाणार आहेत.