दुचाकी-ट्रॅक्टरच्या धडकेत तिघे ठार
बोथली येथील घटना; नाटक बघण्यासाठी जात असताना घडली घटना
सकाळ वृत्तसेवा
सावली, ता. २८ ः तालुक्यातील बोथली येथे दुचाकीने उभ्या ट्रॅक्टरला धडक दिली. या अपघातात तिघांचा मृत्यू झाला. ही घटना बुधवार (ता. २७) रात्री नऊ वाजताच्या सुमारास घडली. मृतांत साहिल अशोक कोसमशिले (वय १९ रा. बोथली ता. सावली), हर्षल संदीप दंडावार (वय २१ रा. बोरचांदली) आणि साहिल नंदू गणेशकर (वय २० रा. भंगाराम तळोधी) यांचा समावेश आहे. तिघेही मित्र हिरापूर येथे नाटक बघण्यासाठी जात असतानाच ही घटना घडली.
सावली तालुक्यातील बोथली येथे साहिल अशोक कोसमशिले राहत होता. त्याला भेटण्यासाठी हर्षल संदीप दंडावार आणि साहिल नंदू गणेशकर हे बुधवार (ता. २७) एमएच ३४ एल ३२२९ या क्रमांकाच्या वाहनाने आले. भेट झाल्यावर तिघांनीही हिरापूर येथे नाटक बघण्याचे नियोजन केले. सध्या नाटकांचा हंगाम सुरू आहे. रात्री दहा वाजतानंतरच नाटके सुरू होतात. त्यामुळे तिघेही दुचाकीने हिरापूर येथे नाटक बघण्यासाठी निघाले. सावली-हिरापूर मार्गावर अनेक वळणे आहेत. मार्कंडेय विद्यालयाजवळील एका वळणावर उभ्या असलेल्या एमएच ३४ एपी १०४२ या क्रमांकाच्या ट्रॅक्टरला दुचाकीने जोरदार धडक दिली. ही धडक इतकी भीषण होती की, हर्षल संदीप दंडावार याचा जागीच मृत्यू झाला. साहिल अशोक कोसमशिले आणि साहिल नंदू गणेशकर हे गंभीर जखमी झाले. या मार्गाने ये-जा करणाऱ्या वाहनचालकांच्या लक्षात हा प्रकार आला. त्यांनी गंभीर जखमी असलेले साहिल कोसमशिले आणि साहिल नंदू गणेशकर यांना सावली येथील ग्रामीण रुग्णालयात उपचाराकरिता दाखल केले, मात्र दोघांचीही प्रकृती गंभीर होती. त्यामुळे त्यांना ग्रामीण रुग्णालयातील वैद्यकीय अधिकाऱ्यांनी गडचिरोली येथील जिल्हा सामान्य रुग्णालयात हलविण्याचा सल्ला दिला. त्यानुसार दोघांनाही गडचिरोली येथे नेण्यात येत होते, मात्र वाटेतच साहिल नंदू गणेशकर याचा मृत्यू झाला. गडचिरोली येथील जिल्हा सामान्य रुग्णालयात साहिल अशोक कोसमशिले याचा उपचारादरम्यान मृत्यू झाला. या घटनेचा तपास सावलीचे पोलिस निरीक्षक पुल्लुरावार यांच्या मार्गदर्शनात सहायक फौजदार चरणदास मडावी, शिपाई अमोल गणफाडे, मोहन दासरवार करीत आहे.
---------
इन्फो
आंध्रप्रदेशात होते कामावर
साहिल कोसमशिले, हर्षल दंडावार आणि साहिल गणेशकर हे तिघेही आंध्रप्रदेशात कामावर होते. यातून या तिघांची मैत्री झाली. काही दिवसांपूर्वीच सुट्या घेऊन तिघेही आपआपल्या गावी आले होते. बुधवारी तिघेही भेटले. त्यानंतर नाटक बघण्यासाठी तिघेही दुचाकीने निघाले. वाटेतच त्यांचा ट्रॅक्टरला धडक दिल्याने झालेल्या अपघातात मृत्यू झाला. या घटनेने तिन्ही कुटुंबीयांवर दुःखाचा डोंगर कोसळला आहे.