उल्हासनगर, ता. २० (वार्ताहर) : शहरातील रस्त्यांवरील खड्डे आता जीवघेणे ठरत असून, याचा प्रत्यय पुन्हा एकदा उल्हासनगरात आला आहे. कॅम्प ४मधील व्हीटीसी मैदानाजवळील मोठ्या खड्ड्यात पडून एका व्यक्तीला गंभीर दुखापत झाली आहे. या निष्काळजीविरोधात नागरिकांमध्ये संतापाची लाट उसळली आहे.
उल्हासनगर शहरातील पावसाळ्यापूर्वी सुरू असलेल्या भुयारी गटार योजनेमुळे रस्त्यांवर ठिकठिकाणी खोदकाम सुरू आहे. या खोदलेल्या रस्त्यांभोवती सुरक्षेच्या दृष्टीने कोणतीही उपाययोजना न केल्याने अपघातांचे प्रमाण वाढत आहे. अशीच एक धक्कादायक घटना उल्हासनगर कॅम्प क्र. ४ मध्ये घडली आहे. व्हीटीसी मैदानाजवळ रस्त्याच्या मध्यभागी खोदलेल्या खड्ड्यात वीरेंद्र कुमार यांना पावसाच्या पाण्याचा अंदाज न आल्याने पडला. सोमवारी संध्याकाळी अवकाळी पावसाने रस्त्यावरील या खड्ड्यांमध्ये पाणी साचले होते. त्यामुळे खड्डे दिसून येत नव्हते. कामावरून घरी जाताना वीरेंद्र कुमार यांना या खड्ड्याचा अंदाज न लागल्याने पडले आणि त्यांच्या पायाला गंभीर दुखापत झाली. दुर्घटनेनंतर त्यांना तत्काळ उल्हासनगरमधील मध्यवर्ती रुग्णालयात दाखल करण्यात आले. मात्र, इजा गंभीर असल्यामुळे पुढील उपचारासाठी त्यांना कळवा येथील रुग्णालयात हलवण्यात आले. या अपघाताच्या घटनेनंतर स्थानिक नागरिकांनी ठेकेदार आणि महापालिकेच्या निष्काळजीवर तीव्र नाराजी व्यक्त केली आहे. रस्त्यावर मोठ्या प्रमाणात खड्डे असून, कोणत्याही खड्ड्याभोवती बॅरिकेट, इशारा फलक नाही. त्यामुळे नागरिकांच्या जीवाशी सर्रास खेळ केला जात असल्याची भावना व्यक्त होत आहे.

खड्ड्यांना संरक्षित करावे!
उल्हासनगरातील अपूर्ण विकासकामे, त्यावरची फक्त कागदी देखरेख आणि ठेकेदारांच्या निष्काळजीमुळे नागरिकांना प्राण गमावण्याची वेळ येऊ नये, अशी मागणी आता जोर धरत आहे. प्रशासनाने तत्काळ अशा खड्ड्यांना सुरक्षिततेच्या दृष्टीने संरक्षित करावे, अशी स्थानिकांची मागणी आहे.