डोंबिवलीत ‘क्लीन अप मार्शल’ची दादागिरी
नागरिकांना लेखी तक्रार करण्याचे पालिकेचे आवाहन
सकाळ वृत्तसेवा
डोंबिवली, ता. २३ : धूम्रपान, सार्वजनिक ठिकाणी थुंकणे, कचरा टाकणे, गुटखा खाणे यांसारख्या कारणावरून दंडाच्या नावाखाली दंडाच्या रकमेपेक्षा जास्त पैसे आकारतात. तसेच काहीवेळा पावती दिली जात नाही. अनेकदा प्रवाशांना दमदाटी केली जाते. त्यामुळे क्लीन अप मार्शलच्या या दादागिरीमुळे डोंबिवलीकर सध्या त्रस्त आहेत. रेल्वेस्थानक परिसरातील क्लीन अप मार्शल नागरिकांना नाहक त्रास देत असल्याची नागरिकांची तक्रार आहे. यावर पालिका प्रशासनाने नागरिकांना लेखी तक्रारी करण्याचे आवाहन केले आहे.

कल्याण-डोंबिवली महापालिकेने शहरात स्वच्छता राखण्यासाठी ‘क्लीन अप मार्शल’ नेमले असून, त्यांना ठेकेदारामार्फत नियुक्त केले जाते; मात्र स्थानक परिसरात चॉकलेट किंवा वेफर्सचा कागद टाकल्यावरही २०० ते ३०० रुपये दंड आकारल्याच्या तक्रारी नागरिकांनी केल्या आहेत. नागरिकांनी हेही निदर्शनास आणून दिले की, स्थानकाच्या बाहेर कचरापेटी नाही, तसेच ‘कारवाईचा इशारा’ देणारे फलकही लावलेले नाहीत. त्यामुळे हे मार्शल दंड कसा वसूल करू शकतात, असा सवाल नागरिकांनी उपस्थित केला आहे.

डोंबिवली शहरातील ह, ग, फ, आय आणि इ प्रभागांमध्ये एका खासगी कंपनीला क्लीन अप मार्शलचा ठेका दिला आहे. कंपनीने क्लीन अपसाठी ६० कर्मचारी नियुक्त केले आहेत; मात्र हे कर्मचारी निवडक ठिकाणीच घोळक्याने उभे राहात असल्याचे दिसून येते, हा भाग जणू त्यांचा अड्डा बनला आहे. या कर्मचाऱ्यांकडून नागरिकांकडे दंडाच्या रकमेपेक्षा अधिक पैसे मागितले जातात. नागरिकांनी विरोध केला की, वाद वाढतो, बाचाबाची होते, शिवीगाळ होते. अनेकदा हे कर्मचारी त्यांचा गणवेश अथवा ओळखपत्रही घालताना दिसत नाहीत. अशात काही मार्शल नागरिकांना उद्दामपणे ‘आमच्याविरोधात तक्रार करायची असेल, तर आयुक्तांकडे कशाला करता थेट पंतप्रधानांकडे तक्रार करत जा’ असे नागरिकांना म्हणतात. यामुळे नागरिकांमध्ये नाराजीचे वातावरण आहे.

स्टिंग ऑपरेशन
कल्याण शहरात यापूर्वी अशाच प्रकारच्या तक्रारींनंतर महापालिका अधिकारी यांनी ‘स्टिंग ऑपरेशन’ करून ठेकेदाराचा भांडाफोड केला होता. त्यावर तत्कालीन पालिका आयुक्त डॉ. इंदुराणी जाखड यांनी त्या ठेकेदाराचा ठेका रद्द केला होता; मात्र त्या ठेकेदाराचा डोंबिवलीतील कंत्राट तसेच सुरू असून, त्यांचे कर्मचारी डोंबिवलीकरांना त्रास देत आहेत. यामुळे त्यांचा डोंबिवलीतील ठेका रद्द करून दुसऱ्यांना ठेका द्यावा किंवा पालिका प्रशासनाने त्यावर नियंत्रण ठेवावे, अशी मागणी नागरिक करत आहेत. यावर पालिका प्रशासन नागरिकांनी पालिकेकडे लेखी तक्रारी कराव्यात त्यांच्या तक्रारीची दखल घेतली जाईल, असे सांगण्यात येत आहे.

ठेका रद्द करण्याची मागणी
शहर स्वच्छ ठेवणे ही सगळ्यांचीच जबाबदारी आहे; मात्र क्लीन अप मार्शलकडून होत असलेली दादागिरी, उर्मट वर्तन आणि अधिक रकमेची वसुली अशोभनीय आहे, असे नागरिकांचे म्हणणे आहे. त्यामुळे महापालिका आयुक्त अभिनव गोयल यांनी या प्रकरणात लक्ष घालून, संबंधित ठेकेदारावर कारवाई करावी किंवा ठेका रद्द करावा, अशी मागणी जोर धरू लागली आहे.

क्लीन अप मार्शलकडून उर्मटपणा, दादागिरी होत असल्याचे कानावर येत आहे. नागरिकांना जो काही त्रास होत असेल, त्याविषयी त्यांनी पालिका प्रशासनाकडे लेखी तक्रारी कराव्यात. लेखी तक्रारींची दखल घेत त्या अनुषंगाने नक्कीच कारवाई केली जाईल. तक्रार प्राप्त झाल्यास चौकशी करून ठेकेदारावर कायदेशीर कारवाई केली जाईल.
- वसंत देगलूरकर, मुख्य स्वच्छता निरीक्षक, महापालिका.