कळवा, ता.२३ (बातमीदार)ः खारेगाव नाक्याजवळ रस्त्याच्या कडेचे महाकाय झाड कोसळल्याने प्रचंड वाहतूक कोंडी झाली होती. यामुळे अर्धातास वाहने एकाच जागी खोळंबल्याने कळवा नाका ते खारेगाव पारसिक नगरपर्यंत वाहनांच्या रांगा लागल्या होत्या.
रस्त्याच्या कडेला महानगर गॅस कंपनीच्या ठेकेदाराने गॅस वाहिनी खोदण्याचे काम सुरू केले आहे. त्यामुळे रस्त्याच्या कडेला आलेल्या गटारात पाणी साचल्याने झाडांमुळे कमकुवत झाल्याचे बोलले जात आहे. अग्निशमन दलाच्या जवानांसोबत कळवा आपत्ती व्यवस्थापन कक्षाच्या कर्मचाऱ्यांनी घटनास्थळावरील झाड तोडल्यानंतर वाहतूक अखेर सुरळीत झाली.