विजयनगरात गर्दुल्ल्यांचा उपद्रव
अनेक वाहनांच्या फोडल्या काचा
कल्याण, ता. ७ (बातमीदार) : विजयनगर येथील सेंट थॉमस शाळेच्या परिसरात मध्यरात्रीच्या सुमारास काही टवाळखोरांनी प्रगती अपार्टमेंटमध्ये उभ्या असलेल्या असंख्य वाहनांच्या काचा फोडून नुकसान केले. यामुळे परिसरात दहशतीचे वातावरण पसरले असून, पोलिसांनी याची गंभीर दखल घ्यावी, अशी मागणी स्थानिक करत आहेत. कोळसेवाडी पोलिसांनी घटनास्थळी येऊन पंचनामा करीत पुढील तपास सुरू केला आहे. समाजात उच्छाद मांडणाऱ्या या टोळक्यांचा कायमचा बंदोबस्त करणे, आता आणखी गरजेचे बनले आहे. कल्याण परिमंडळ-३ अंतर्गत अमली पदार्थांविरोधात मोहीम राबविली असून, आतापर्यंत अनेकांना कोट्यवधी रुपयांच्या अमली पदार्थांसह अटक केली आहे. रात्री-अपरात्री दारू, चरस, गांजा, ड्रग्जसारख्या अमली पदार्थांचे सेवन करून नशेत हिंसक व उपद्रव माजविण्याचे प्रकार नशाखोरांकडून होत असतात. मागील महिन्यातच कल्याण पूर्व आमराई भागात यशवंत हाइट्स इमारत परिसरात एका टोळक्याने रात्रीच्या वेळी एका व्यक्तीला मारहाण केली होती. त्यामुळे रात्रीच्या वेळी नशा करून फिरणाऱ्या या हिंसक टोळक्यांवर कारवाई सुरू ठेवावी, अशी मागणी होत आहे.