भटक्‍या श्‍वानांचा एकावर हल्‍ला
मालाड, ता. ९ (बातमीदार) ः मालवणीतील एमएचबी कॉलनीतील ५० वर्षीय रफिक शेख यांच्यावर भटक्‍या श्‍वानांनी हल्‍ला करून चावा घेतल्‍याची घटना मंगळवारी (ता. ८) रात्री घडली. काही भटके श्‍वान लहान मुलांवर भुंकत असल्‍याने मुलांच्या मदतीसाठी गेले असता रफिक यांच्यावर श्‍वानाने हल्‍ला केला.
रफिक यांच्या उजव्या हाताचा लचका श्वानांनी तोडला. पाय आणि इतर भागातही दुखापत झाली आहे. अचानक झालेल्‍या हल्‍ल्‍यामुळे हृदयरोगाने ग्रस्त रफिक शेख खूप घाबरले होते. सुदैवाने काही लोकांनी श्वानांना तिथून पळवून लावल्‍याने शेख बचावले. कांदिवलीतील डॉ. बाबासाहेब आंबेडकर रुग्णालयात त्‍यांना उपचारासाठी दाखल केले आहे. पालिकेने भटक्‍या श्‍वानांचा बंदोबस्‍त करावा, अशी मागणी नागरिकांनी केली आहे.