घरात शिरून लांबवला मोबाईल
कल्याण, ता. २० (बातमीदार) : दूध नाका चौधरी मोहल्ला येथे एका चोरट्याने उघड्या दरवाजातून घरात प्रवेश करीत घरातील मोबाईल चोरून नेला होता. याबाबत बाजारपेठ पोलिस ठाण्यात केलेल्या तक्रारीनंतर गुन्हा दाखल झाला होता. पोलिसांनी गुप्त माहितीच्या आधारे शोध घेत या चोराला मोबाईलसह ताब्यात घेतले आहे. गुन्ह्यातील एक संशयित आरोपी हा एपीएमसी मार्केट येथील वजन काटाजवळील गेटवर फिरत असल्याची माहिती पोलिसांना मिळाली होती. त्यानुसार बाजारपेठ पोलिस ठाण्यातील पोलिस हवालदार प्रेम बागुल, परमेश्वर बाविस्कर, रवींद्र भालेराव व पोलिस शिपाई राहुल इशी यांनी पळण्याच्या तयारीत असलेल्या आरोपीला शिताफीने ताब्यात घेतले. श्रीकृष्ण आसाराम ताठे (४२) असे या आरोपीचे नाव असून, तो मूळचा परभणीचा आहे. सध्या दादर येथे वास्तव्यास असल्याचे त्याने चौकशीदरम्यान सांगितले. त्याची झाडाझडती घेतली असता त्याच्याजवळ गुन्ह्यातील चोरीस गेलेला मोबाईल सापडला. या गुन्ह्यात त्याला अटक करून त्याने आणखीन किती मोबाईल चोरी केले आहेत याचा पुढील तपास बाजारपेठ पोलिस करीत आहेत.