अग्निशमन दलाच्या जवानांकडून तरुणीचा सिनेस्टाइल बचाव
कांदिवली, ता. २१ (बातमीदार)ः कांदिवली पश्चिमेला एक तरुणी इमारतीच्या १५व्या मजल्यावरून आत्महत्येचा प्रयत्न करीत होती. याची माहिती मिळताच अग्निशमन दलाच्या जवानांनी जीवाची बाजी लावून तरुणीला वाचविले. स्थानिक नागरिकांकडून अग्निशमन दल जवानांच्या कार्याचे कौतुक केले जात आहे.
विघ्नहर्ता आंबेवाडी एसआरए इमारतीच्या १५व्या मजल्यावरून एक २५ वर्षांची तरुणी आत्महत्या करण्याचा प्रयत्न करीत होती. ही माहिती मिळताच कांदिवलीचे वरिष्ठ केंद्रप्रमुख अमित पडवळ हे आपल्या जवानांसह तातडीने घटनास्थळी हजर झाले. शनिवार (ता. १९) रात्री १२ वाजण्याच्या सुमारास पोलिसांनी आणि अग्निशमन जवानांनी, तरुणीशी संवाद साधात मनपरिवर्तन करण्याचे प्रयत्न चालू केले. योजनेनुसार अग्निशमन जवान विष्णू मुंडे यांनी दोरीच्या साहाय्याने पॅराशूटला गाठ मारून तयार ठेवली होती आणि एक टीम बेडरूमच्या बाहेर रेस्क्यू टूल्स घेऊन तयार होती. तिचे लक्ष पोलिसांसोबत बोलण्याकडे असताना विष्णू मुंडे यांनी बाजूला असलेल्या रेफ्युज फ्लॅटच्या खिडकीतून सज्जामध्ये उडी घेत तिला पकडले. त्याच वेळी बेडरूमच्या दरवाजाबाहेर तैनात असलेल्या टीमने इशारा मिळताच वेबर रेस्क्यू टूलच्या साहाय्याने दोन सेकंदात दरवाजा तोडून आत प्रवेश केला. तिला वरिष्ठ केंद्र अधिकारी अमित पडवळ व अग्निशमन जवान माधव नाइनवाड यांनी तरुणीला सुरक्षितरीत्या वर घेतले. यानंतर तरुणी तणावात असल्याने तिला धीर देत जवानांनी कुटुंबीयांच्या हवाली केले. अग्निशमन जवानांनी केलेल्या धाडसी कार्याचे स्थानिक नागरिकांनी कौतुक केले.