मुंबई-गोवा महामार्गावरील पथदिवे बंद
पळस्पे ते वडखळपर्यंत विद्युत खांब उभारले, मात्र बिल न भरल्याने पथदिवे बंद
पेण, ता. २१ (वार्ताहर) : मुंबई-गोवा महामार्गावरील पुलांवर उभारलेले पथदिवे काही दिवसांपासून बंद असल्याने वाहनधारकांना अंधाराचा सामना करावा लागत आहे. त्यामुळे पथदिवे सुरू करण्यात यावेत, अशी मागणी वाहनधारकांकडून करण्यात येत आहे.
पनवेल पळस्पे फाटा येथून सुरू झालेल्या महामार्गाच्या चौपदरीकरणाचे काम पेण ते वडखळपर्यंत पूर्ण झाले असले तरी यादरम्यान ठिकठिकाणी पुलांवर विद्युत खांबांची उभारणी करून पथदिवे लावले आहेत. त्यामुळे महामार्ग रात्रीच्या सुमारास मुंबई-गोवा महामार्गावरून अलिबाग, मुरूड, श्रीवर्धन, हरिहरेश्वर, गणपतीपुळे, रत्नागिरी, मालवण, सिंधुदुर्ग या ठिकाणी जाणाऱ्या हजारो पर्यटकांना याचा फायदा झाला. यामुळे अपघातांना आळा बसत होता, परंतु पेण हद्दीतील पुलांवरील पथदिवे काही दिवसांपासून बंद असल्याने वाहनधारकांना फटका बसत आहे. यामुळे अपघाताचे प्रमाण पुन्हा वाढण्याची भीती निर्माण झाली आहे. त्यामुळे हे पथदिवे तत्काळ सुरू करावेत, अशी मागणी वंचित बहुजन आघाडीचे तालुकाध्यक्ष सुनील धामणकर यांनी केली आहे.
मुंबई-गोवा महामार्गावरील पनवेलपासून पुढे पेण-वडखळपर्यंतच्या पुलावर विद्युत खांब उभारणी करून त्यावर पथदिवे बसवून ते सुरू करण्यात आल्याने रात्रीच्या सुमारास महामार्गावरील वाहनधारकांचा प्रवास सुकर होत होता, परंतु या पथदिव्यांचे बिल अदा न केल्यामुळे
काही दिवसांपासून बंद आहेत. त्यामुळे संबंधित खात्याने तत्काळ बिल भरावे म्हणजे पुलांवरील पथदिवे सुरू राहतील.
- विश्वास म्हात्रे, इलेक्ट्रिक कॉन्ट्रॅक्टर जे. एम. इन्फ्रास्ट्रक्चर

महामार्गावर लावलेल्या पथदिव्यांचे बिल संबंधित खात्याने मार्चपर्यंतच्या पुढे साधारणपणे अडीच ते तीन लाख रुपये न भरल्यामुळे पथदिव्यांचा वीजपुरवठा खंडित करण्यात आला आहे.
- आशीष मेश्राम, उपकार्यकारी अभियंता, पेण