स्वच्छतागृह तोडफोडप्रकरणी गुन्हा दाखल करण्याचे आदेश

भाईंदर, ता. २१ (बातमीदार) : मिरा-भाईंदर महानगरपालिकेच्या पश्चिम येथील स्वच्छतागृहाची तोडफोड केल्याप्रकरणी उपकंत्राटदारावर गुन्हा दाखल करण्याचे आदेश प्रशासनाकडून मूळ कंत्राटदाराला देण्यात आले आहेत; मात्र त्यानंतरही मूळ कंत्राटदाराने उपकंत्राट देण्याच्या नियमात तरतूद नसताना ते कसे दिले, यावर प्रश्नचिन्ह उपस्थित होत आहे.
क्रांतीनगर झोपडपट्टीत स्वच्छतागृहाची पुनर्निर्मिती करण्याचे कंत्राट महापालिकेने जैनम एन्टरप्रायझेस या कंपनीला दिले होते; मात्र या कंत्राटदाराने स्वत: काम न करता बांधकामाचे उपकंत्राट दिले. जैनम एन्टरप्रायझेस या मूळ कंत्राटदाराने कामाचे पैसे न दिल्याच्या रागातून उपकंत्राटदाराने रविवारी (ता. २०) बांधलेल्या स्वच्छतागृहात तोडफोड केली. स्थानिक माजी नगरसेवक पंकज पांडे यांनी कंत्राटदारावर गुन्हा दाखल करण्याची मागणी महापालिका आयुक्तांकडे केली होती. प्रत्यक्षात मात्र महापालिकेने ही जबाबदारी मूळ कंत्राटदारावर ढकलली आहे. तोडफोड केल्याप्रकरणी उपकंत्राटदारावर गुन्हा दाखल करण्यात यावा, असे आदेश महापालिका प्रशासनाने जैनम एन्टरप्रायझेसला दिले आहेत. हा गुन्हा दाखल झाला नाही तर महापालिका प्रशासन जैनम एन्टरप्रायझेसवर गुन्हा दाखल करेल, अशी माहिती शहर अभियंता दीपक खांबित यांनी दिली.

निम्म्या किमतीत काम उपकंत्राटदाराला
दुसरीकडे या कामासाठी एक कोटीहून अधिकची निविदा महापालिकेने जैनम एन्टरप्रायझेसला मंजूर केली होती; मात्र जैनमने हे काम उपकंत्राटदाराला जवळपास निम्म्या किमतीत करायला दिले असल्याची माहिती सूत्रांनी दिली. त्यामुळे स्वच्छतागृहाच्या दर्जावरदेखील प्रश्नचिन्ह उपस्थित होत आहे. तर, नियमानुसार महापालिकेच्या कंत्राटदाराला त्याला मिळालेल्या कामाचे उपकंत्राट देता येत नाही, असे असतानाही जैनम एन्टरप्रायझेसने कामाचे उपकंत्राट कसे दिले, हा प्रश्नदेखील यानिमित्ताने विचारला जात आहे.