गांजा विक्रीप्रकरणी दोघांना अटक
कासा, ता. २१ (बातमीदार) : गांजा या अमली पदार्थाची बेकायदा विक्री व वाहतूक करणाऱ्या दोघांना तलासरी पोलिसांनी अटक केली. त्यांच्याकडून एकूण तीन लाख ९४ हजारांचा मुद्देमाल जप्त केला. पोलिस उपनिरीक्षक विकास दरगुडे, हिरा खोटरे आणि कमलेश वरखंडे रविवारी (ता. २०) सकाळी गस्त घालत होते. या वेळी पोलिस निरीक्षक अजय गोरड यांना माहिती मिळाली होती, की दोन व्यक्ती गांजा या अमली पदार्थाच्या खरेदी-विक्रीसाठी तलासरी इभाडपाडा येथील तास्कंद हॉटेलजवळ येणार आहेत. त्यानंतर तत्काळ वरिष्ठ अधिकाऱ्यांची परवानगी घेत छापा टाकण्यात आला. पंच, वजनकाटादार, फोटोग्राफर आणि पोलिस पथकासह सापळा रचण्यात आला. काही वेळातच माहितीप्रमाणे दोन व्यक्ती तिथे आल्याचे निदर्शनास येताच त्यांना अटक करण्यात आली. त्यांच्या गाडीची तपासणी केली असता २.३३० किलो गांजासदृश पदार्थ सापडला. दुर्योधन स्वाईन (वय ३८, रा. सुतारपाडा), नवसू धोडी (वय २४, रा. खेरडी खाडीपाडा, दादरा नगर हवेली) या दोन आरोपींना अटक करण्यात आली.
त्यांच्याकडून ४६ हजार ६६० रुपयांचा गांजासदृश पदार्थ, २९ हजार ५०० रुपयांचे दोन मोबाईल फोन आणि तीन लाख ९४ हजार १६० रुपये किमतीच्या दोन दुचाकी जप्त करण्यात आल्या. सहाय्यक पोलिस खोटरे यांच्या तक्रारीवरून तलासरी पोलिस ठाण्यात गुन्हा दाखल केला असून, या प्रकरणाचा पुढील तपास पोलिस उपनिरीक्षक अमोल चिंधे करीत आहेत.