बेकायदा भोंग्यांवर
कारवाई करा : सोमय्या
पनवेल, ता. २१ (बातमीदार) : धर्माच्या नावावर कोणतीही दादागिरी खपवून घेतली जाणार नाही. कायदा व सुव्यवस्थेचे पालन अनिवार्य आहे, असे ठाम मत भाजपचे ज्येष्ठ नेते आणि माजी खासदार किरीट सोमय्या यांनी व्यक्त केले. सोमवारी त्यांनी पनवेल दौरा केला. शहरातील अनधिकृत भोंग्यांमुळे वाढणारे ध्वनिप्रदूषण आणि त्यामुळे नागरिकांत निर्माण झालेली नाराजी लक्षात घेत प्रशासनाने ठोस पावले उचलावीत, अशी मागणी त्यांनी केली.
महाराष्ट्रात सुरू असलेल्या ‘भोंगामुक्त’ मोहिमेला गती देण्यासाठी सोमय्या यांनी आमदार प्रशांत ठाकूर यांच्यासोबत पनवेल व परिसरातील पोलिस ठाण्यांना भेटी दिल्या. खारघर, कळंबोली आणि तळोजा पोलिस ठाण्यांत त्यांनी अनुक्रमे वरिष्ठ पोलिस निरीक्षक अजय कांबळे, राजेंद्र कोते आणि प्रवीण भगत यांच्याशी चर्चा केली. शहरातील बेकायदा भोंगे तातडीने हटवावेत, अशी मागणी त्यांनी केली. या मागणीला पोलिस प्रशासनाने सकारात्मक प्रतिसाद देत पुढील आठ दिवसांत कारवाई करून बेकायदा भोंगे बंद करण्याचे आश्वासन दिले. सोमय्या यांनी या वेळी सांगितले की, धार्मिक भावना जपताना कायद्याचे उल्लंघन होणार नाही याची खबरदारी प्रत्येकाने घ्यावी. या दौऱ्यात भाजपचे अनेक स्थानिक पदाधिकारी, कार्यकर्ते आणि नागरिक मोठ्या संख्येने उपस्थित होते.