भाईंदर (बातमीदार) : शहाड येथील अशुद्ध जल उदंचन केंद्रावर वीज मीटर बदलण्याचे काम व जलवाहिनीला होत असलेली गळती बंद करण्याचे काम करणे आवश्यक असल्याने मिरा-भाईंदरला पाणीपुरवठा करणाऱ्या स्टेम प्राधिकरणामार्फत शुक्रवारी (ता. २५) शटडाऊन घेण्यात आला आहे. त्यामुळे शुक्रवारी सकाळी नऊ ते शनिवारी (ता. २६) सकाळी नऊ वाजेपर्यंत २४ तासांसाठी शहराला होणारा पाणीपुरवठा पूर्णपणे बंद राहणार आहे. या वेळी महाराष्ट्र औद्योगिक विकास महामंडळ प्राधिकरणाकडून होणारा पाणीपुरवठा सुरू राहणार आहे. स्टेम प्राधिकरणाकडून होणारा पाणीपुरवठा पूर्ववत होईपर्यंत मिरा-भाईंदर शहराला पाणीपुरवठा कमी दाबाने व उशिराने होणार आहे. त्यामुळे नागरिकांनी पाण्याचा वापर काटकसरीने करावा, असे आवाहन महापालिकेकडून करण्यात आले आहे.