आक्षेपार्ह पोस्ट टाकणाऱ्यांना अटक
चेंबूर, ता. ६ (बातमीदार) ः डाॅ. बाबासाहेब आंबेडकर तसेच मुस्लीम धर्माविषयी समाजमाध्यमांवर आक्षेपार्ह पोस्ट टाकणाऱ्या दोन आरोपींना नेहरूनगर पोलिसांनी बेड्या ठोकल्या. न्यायालयाने त्यांना न्यायालयीन कोठडी दिली आहे. दरम्यान, या कारवाईबद्दल भीम आर्मीने पोलिसांचे अभिनंदन केले. संतोषकुमार संगम (४३, रा. झारखंड), अंकीत वर्मा (१८, मध्य प्रदेश), नरेंद्र परायण सिंग (४०, बिहार) यांनी आक्षेपार्ह मजकूर असलेल्या पोस्ट शेअर केल्या होत्या. याप्रकरणी भीम आर्मी या संघटनेचे कार्यकर्ते सुनील वाकोडे यांनी स्थानिक नेहरूनगर पोलिस ठाण्यात लेखी तक्रार करीत आरोपींवर कडक कारवाईची मागणी केली होती. त्यानुसार आरोपींविरोधात गुन्हा दाखल झाला होता. दरम्यान, नेहरूनगर पोलिस ठाण्याचे वरिष्ठ पोलिस निरीक्षक अंकुश खेडकर यांच्या मार्गदर्शनाखाली पोलिस निरीक्षक राजेंद्र ठिकेकर यांनी याप्रकरणी कसून तपास केला. सिम कार्ड आणि मोबाईल बदलत पोलिसांना सतत हुलकावणी देणाऱ्या संतोषकुमार संगम व अंकित वर्मा या दोन आरोपींना अटक केली. यातील तिसरा आरोपी नरेंद्र परायन सिंग हा मृत झाला असल्याचे पोलिसांनी सांगितले. पोलिसांनी केलेल्या कारवाईनंतर पोलिस निरीक्षक राजेंद्र ठिकेकर यांचे भीम आर्मीचे मुंबई अध्यक्ष अविनाश गरुड, चेंबूर तालुका अध्यक्ष प्रवीण भोसले, सुनील वाकोडे, संजय बचाटे यांनी भेट घेऊन अभिनंदन केले.