गोवे गावात रंगला शक्ती-तुराचा जंगी सामना
रोहा, ता. २ (बातमीदार) ः कोलाडजवळील गोवे गावातील अर्जुन पवार परिवार गणपती उत्सवाला ७५ वर्षे पूर्ण होत असल्याने या अमृत महोत्सवानिमित्त महिलांच्या नृत्याचा शक्ती-तुरा सामना आयोजित करण्यात आला होता. या कार्यक्रमाच्या निमित्ताने परिसरातील नागरिक मोठ्या संख्येने उपस्थित होते.
या ठिकाणी गणेशोत्सवात सतत सात दिवस विविध धार्मिक कार्यक्रम आयोजित करण्यात आले होते. पहिल्या दिवशी श्री शिव शंभू मंडळ गोवे यांचे भजन, दुसऱ्या दिवशी श्री दत्त कृपा प्रासादिक मंडळ चोले, तिसऱ्या दिवशी आनंदी माता मंडळ ढोकलेवाडी तर चौथ्या दिवशी शिरीष अनप्लग पाले खुर्द यांचे भजन झाले. पाचव्या दिवशी रविवारी (ता. ३१) सत्यनारायण पूजा झाली. रात्री शक्तिवाले शाहीर श्री गावदेवी नाच मंडळ मुडानी, कवी चंद्रकांत थोरवे, तुरेवाले शाहीर बापदेव नाच मंडळ बोरणवाडी, कवी प्रभाकर ओव्हाळ यांचा महिला नृत्यांचा जंगी सामना रंगला तर सोमवारी (ता. १) शेवटच्या दिवशी एकता ग्रामस्थ महिला मंडळ भवरी नाच आयोजित करण्यात आला होता. याप्रसंगी विविध मान्यवर, गोवे ग्रामस्थ, सरपंच तसेच पवार कुटुंब परिवारातील माहेरवाशिणी माता-भगिनींनी यांनी भेटी दिल्या.