कासा (बातमीदार) : डहाणू शहरातील पोंदा कॉलेज, पारनाका परिसरातून बुधवारी (ता. ८) सकाळी १७ वर्षीय तरुणी बेपत्ता झाल्याची घटना समोर आली आहे. सकाळच्या सुमारास ही मुलगी महाविद्यालयासाठी घरातून निघाली होती. नेहमीप्रमाणे तिच्या भावाने तिला पारनाका परिसरात कॉलेजजवळ सोडले, मात्र त्यानंतर ती घरी परतलीच नाही. या घटनेमुळे मुलीच्या कुटुंबात भीतीचे व चिंतेचे वातावरण पसरले असून, त्यांनी अपहरणाचा संशय व्यक्त केला आहे. या मुलीच्या आईने डहाणू पोलिस ठाण्यात अज्ञात व्यक्तीविरोधात तक्रार दाखल केली आहे. पोलिसांनी या प्रकरणी तातडीने कारवाई करत गुन्हा नोंदवून तपास सुरू केला आहे. परिसरातील सीसीटीव्ही फुटेज तपासले जात आहेत.