टिळक भवनमध्ये आज ‘घर हक्क परिषद’
शिवडी, ता. ११ (बातमीदार) ः देशातील प्रत्येक नागरिकाला घटनेने अन्न, वस्त्र, निवारा, रोजगार, शिक्षण, आरोग्य आदी मूलभूत अधिकार दिले आहेत. तेव्हा बंद कारखान्यातील कामगार घरापासून वंचित राहता कामा नये, यासाठी रविवारी (ता. १२) दुपारी तीन वाजता दादर येथील काँग्रेस पक्षाच्या टिळक भवनमध्ये ‘घर हक्क परिषद’ पार पडत आहे. परिषदेत प्रदेश काँग्रेसचे अध्यक्ष हर्षवर्धन सपकाळ, ज्येष्ठ पत्रकार माजी खासदार कुमार केतकर, विश्वास उटगी, महाराष्ट्र इंटक, राष्‍ट्रीय मिल मजदूर संघाचे सरचिटणीस गोविंदराव मोहिते, दिवाकर दळवी, आयटक नेते कॉ. सुकुमार दामले, सर्व श्रमिक संघाचे कॉ. ॲड. उदय भट, कॉ. विजय कुळकर्णी, शिशिर ढवळे, ॲड. गायत्री सिंग, राजन राजे आदी कामगार नेत्यांची भाषणे होणार आहेत. महाविकास आघाडीच नव्हे तर राष्ट्रीय स्तरावरील इंडिया आघाडीनेही या परिषदेला पाठिंबा दिला आहे. घर हक्क परिषदेत गिरणी कामगार संयुक्त लढा समितीच्या १५ कामगार संघटना, विविध उद्योगांतील २५ हून अधिक कामगार संघटना सहभागी होणार आहेत.