टोकावडे, ता. १३ (बातमीदार) : मुरबाड तालुक्यातील तळेगाव येथे ग्रामदैवत आई श्री गावदेवी व श्री म्हसोबा यांचा पारंपरिक यात्रा उत्सव १४ ते १६ जानेवारी या कालावधीत श्रद्धा, भक्तिभाव आणि उत्साहाच्या वातावरणात साजरा होत आहे. तळेगावसह उमरोली, खरशेत, भट्टीची वाडी, कुंडाची वाडी, शिरसोनवाडी आदी परिसरातील गावांमधून भाविक मोठ्या संख्येने या यात्रेत सहभागी होत आहेत.
यात्रा उत्सवाच्या पहिल्या दिवशी बुधवारी (ता. १४) सकाळी ग्रामदैवतांची विधिवत महापूजा होणार आहे. दुपारी महाआरतीनंतर महिलांसाठी पारंपरिक हळदी-कुंकू कार्यक्रम होईल. सायंकाळी भाविकांच्या उपस्थितीत भव्य पालखी सोहळा पार पडणार असून, रात्री सर्व भाविकांसाठी महाप्रसाद असणार आहे. हा संपूर्ण यात्रा उत्सव आई गावदेवी व म्हसोबा देवस्थान सेवा समिती आणि ग्रामस्थ मंडळ, तळेगाव यांच्या वतीने होणार आहे. उमरोली, खरशेत, भट्टीचीवाडी, कुंडाचीवाडी, शिरसोनवाडी, फांगळोशी, भिकारवाडी, जडई, आंबिवली, चासोळे, शिवेचीवाडी, दिघेफळ, खुटल (बा.), न्याहाडी आदी परिसरातील ग्रामस्थ व भाविकांनी उपस्थित राहून यात्रेचा लाभ घ्यावा, असे आवाहन आयोजकांनी केले आहे.

भजन-कीर्तनाचा अनुभव
पहिल्या दिवशी रात्री स्वरगंध कलामंच, सरळगाव व तळेगाव यांच्या संयुक्त विद्यमाने भजन कार्यक्रम होणार आहे. कार्यक्रमात प्रसिद्ध गायिका माधुरी घुडे, साईकृपा भजन मंडळ, तळेगावचे गायक दीपकबुवा देशमुख व सहकाऱ्यांचे सादरीकरण होणार आहे.

लोकनाट्य तमाशाचा रंग
गुरुवारी दुपारी महाआरतीनंतर सायंकाळी लोकनाट्य तमाशा कार्यक्रम होणार आहे. रात्री नारायणगाव येथील लोकनाट्य तमाशा मंडळाचे सादरीकरण असणार आहे. हा कार्यक्रम कै. तुकाराम खेडकर व पांडुरंग मुळे (मांजरवाडीकर) यांच्या स्मरणार्थ होणार आहे. तमाशाच्या माध्यमातून पारंपरिक लोककलेचा आस्वाद भाविकांना घेता येणार आहे.

भारुड सम्राटांचा खास कार्यक्रम
यात्रेच्या तिसऱ्या व अंतिम दिवशी शुक्रवारी (ता. १६) दुपारी महाआरतीनंतर रात्री विनोदी भारुड सम्राट व टी.व्ही. स्टार ह.भ.प. श्री. गोविंद महाराज गायकवाड (आळंदी देवाची) यांचा भारुडाचा कार्यक्रम होणार आहे. त्यांच्या सादरीकरणामुळे यात्रेची सांगता भक्तिरस आणि मनोरंजनाच्या वातावरणात होणार आहे.