कंत्राटी शिक्षक आक्रमक
पालघर जिल्हा परिषद कार्यालयासमोर आंदोलन
पालघर, ता. १६ (बातमीदार)ः जिल्ह्यातील पेसा क्षेत्रातील भरती प्रक्रियेत बिगर आदिवासी सर्व समाजातील उमेदवार २०१० पासून कंत्राटी मानधनतत्त्वावर कार्यरत आहेत. अशा शिक्षकांना शासन सेवेत कायमस्वरूपी सामावून घेण्याच्या मागणीसाठी पालघर जिल्ह्यातील कंत्राटी शिक्षक पालघर जिल्हा परिषदेच्या कार्यालयाजवळ बेमुदत धरणे आंदोलन सुरू केले आहे.
पेसा जिल्ह्यातील शिक्षकांची भरती पवित्र पोर्टलद्वारे न करता सरळ सेवेने स्थानिक उमेदवारांमधूनच करावी तसेच सध्या कार्यरत असलेल्या अनुभवी कंत्राटी शिक्षकांना शिक्षक सेवेत म्हणून प्राधान्याने नियुक्ती देण्याची मागणी आंदोलकांची आहे. तसेच पेसा जिल्ह्यात राहणाऱ्या सर्व समाज घटकांना संविधान न्याय मिळावा, कायमस्वरूपी रोजगाराची संधी मिळावी, तसेच कंत्राटी शिक्षकांना सर्वोच्च न्यायालयाच्या आदेशानुसार नियुक्ती मिळावी, अशी मागणी आंदोलकांनी केली. पेसा अंतर्गत आदिवासी सह बिगर आदिवासी स्थानिक कंत्राटी शिक्षकांची पालघर जिल्हा परिषदेमध्ये नेमणुका केल्या होत्या, पण बिगर आदिवासीवर अन्याय करून त्यांच्या नेमणुका झाल्या नाहीत.
-----------------------------
मुलाबाळासह सहभाग
कंत्राटी शिक्षकाने जोरदार घोषणाबाजी दिल्या. तसेच शिक्षकांमध्ये बहुसंख्य महिला आहेत. आपल्या मुलाबाळासह आंदोलनात बसलेले आहेत. या कंत्राटी शिक्षकांना पाठिंबा देण्यासाठी म्हणून विविध पक्षांचे नेतेमंडळी बसले आहेत. आरक्षण बचाव समितीचे प्रशांत पाटील पी. टी. पाटील समन्वयक संतोष पावडे, राजा म्हात्रे, सुभाष मोरे, मनोज घरत, सुनील साखरे आंदोलनात सहभागी झाले.