नांदेड : बोंढार हवेली येथील अक्षय भालेराव या युवकाची हत्या (Akshay Bhalerao Murder Case) निषेधार्ह आहे. पोलिसांनी दिरंगाई, हलगर्जी न करता या गंभीर प्रकरणाचा योग्यपणे सखोल तपास करून दोषींना कठोर शिक्षा होईल, अशा पद्धतीने आरोपपत्र दाखल करावे.

दरम्यान, कोणीही या प्रकरणाला वेगळे वळण देऊन जिल्ह्यातील वातावरण खराब करू नये व शांतता कायम ठेवावी, असे आवाहन माजी मुख्यमंत्री अशोक चव्हाण (Ashok Chavan) यांनी केले आहे. ते म्हणाले की, दोन जून रोजी सकाळी या घटनेबाबत माहिती मिळताच मी संबंधित पोलीस अधिकाऱ्याकडून घटनाक्रम व तपासाच्या प्रगतीची माहिती घेतली.

या प्रकरणाचे गांभीर्य लक्षात घेता पोलिसांनी तातडीने कारवाई करावी, अशी सूचनाही केली. लोकशाही व संविधानानुसार चालणाऱ्या भारतात अशा घटना घडणे चुकीचे आहे. नांदेड जिल्ह्यात घडलेली ही घटना राज्य सरकारचे अपयश आहे. त्यामुळे राज्य सरकारने तातडीने जबाबदारी स्वीकारून हा तपास वेगाने पूर्ण करावा.

तसेच जिल्हा व इतरत्र सामाजिक सलोखा तसेच शांततेचा भंग होणार नाही, याकरिता आवश्यक ती पावले उचलावीत, अशी आमची मागणी आहे. कोणत्याही अफवांना किंवा अपप्रचाराला बळी पडू नये, असे आवाहनही चव्हाण यांनी केले.