करमाळा (सोलापूर) : पिंपळवाडी (ता. करमाळा) येथील शेतकऱ्याला रोजगार हमी योजनेतून लावलेल्या लिंबूच्या बागेचे बिल काढण्यासाठी कृषी सहाय्यकाने पैसे मागितले असल्याची तक्रार पिंपळवाडी येथील आदिनाथ हंबीरराव काळे यांनी मुख्यमंत्री, कृषिमंत्री, रोजगारहमी मंत्री व कृषी अधीक्षक, सोलापूर यांच्याकडे केली आहे.

हेही वाचा - धक्कादायक.. राज्यात एक लाख बाल, अर्भक, उपजत अन्‌ माता मृत्यू

दोन वर्षे होऊन गेली तरी मिळाले नाही बिल
या प्रकारामुळे करमाळा कृषी विभागाचा अनागोंदी कारभार समोर आला आहे. पिंपळवाडी येथील आदिनाथ हंबीरराव काळे यांनी 2017 मध्ये महाराष्ट्र सरकारच्या कृषी विभागामार्फत महात्मा गांधी राष्ट्रीय ग्रामीण रोजगार हमी योजनेअंतर्गत दीड एकरावर लिंबूच्या झाडांची लागवड केली होती. दोन वर्षे उलटून गेली तरी या शेतकऱ्याला अद्याप अनुदान मिळाले नाही. अनुदानाच्या बिलासाठी या शेतकऱ्याने वारंवार मागणी केली. यासाठी करमाळा कृषी कार्यालयात अनेक वेळा फेऱ्या मारल्या; मात्र बिल मिळाले नाही. त्याचे पहिले बिल 30 जानेवारी 2018 रोजी आठ हजार 442 रुपये मिळाले. परंतु बाकीचे राहिलेले 65 हजार 365 रुपये बिल दोन वर्षे होऊन गेली तरी अद्याप मिळाले नाही. याबाबत या शेतकऱ्याने मुख्यमंत्री, कृषिमंत्री, रोजगार हमी मंत्री, जिल्हा कृषी अधीक्षक, उपविभागीय कृषी अधिकारी, तालुका कृषी अधिकारी यांच्याकडे लेखी तक्रार करूनसुद्धा त्याला अद्याप अनुदानाचे बिल मिळाले नाही. दुसरे बिल काढण्यासाठी संबंधित कृषी सहाय्यक केकान हे पैशांची मागणी करतात. यामुळे बिल काढण्यासाठी टाळाटाळ केली जात असल्याचे संबंधित शेतकऱ्याने सांगितले आहे.

हेही वाचा - अप्पर पोलिस अधीक्षकांनी दिला मोलाचा संदेश... काय ते वाचा

योग्य ती कारवाई करणार
मी नुकताच करमाळ्याचा पदभार स्वीकारला आहे. याबाबतची चौकशी करून शेतकऱ्याला न्याय देण्याचा प्रयत्न करतो. यामध्ये जे अधिकारी दोषी आढळतील त्यांच्यावर योग्य ती कारवाई केली जाईल.
- एम. एस. पोले, तालुका कृषी अधिकारी, करमाळा

अन्यथा उपोषण करणार
कृषी सहाय्यक केकान यांना विचारणा केली असता, कृषी खात्यातील गायकवाड हे पैसे दिल्याशिवाय बिलावर सही करत नाहीत, असे सांगतात. तत्कालीन तालुका कृषी अधिकारी गायकवाड यांना बिल मागितले तर त्यांनी उडवाउडवीची उत्तरे दिली. लवकर अनुदान मिळाले नाही तर करमाळा कृषी कार्यालयासमोर उपोषण करणार आहे.
- नितीन काळे, शेतकरी