गडहिंग्लज : इंचनाळ (ता. गडहिंग्लज) येथील गणेश मंदिराच्या दानपेटीत परकिय चलन आढळले आहे. बेहरीन व अमेरिका या दोन देशांचे हे चलन आहे. देवस्थान स्थानिक सल्लागार समितीने ग्रामस्थांच्या उपस्थितीत दानपेटी उघडल्यानंतर ही बाब समोर आली. दानपेटीतील परदेशी चलनाची भाविकात चर्चा होत आहे. 

इंचनाळ येथील प्राचीन गणेश मंदिर पंचक्रोशीतील भाविकांचे श्रद्धास्थान आहे. संकष्टी, अंगारकी संकष्टी, गणेश जयंतीला हजारो भाविक दर्शनासाठी येतात. अंगारकी संकष्टी व गणेश जयंतीला अधिक गर्दी असते. शासनाने गतवर्षी गणेश मंदिराचा क वर्ग पर्यटनस्थळात समावेश केला आहे. त्यातून 25 लाख रुपयांचा निधी उपलब्ध झाला. या निधीतून मंदिर परिसराच्या सुशोभिकरणाची कामे पूर्ण झाली आहेत. आता गणेश मंदिराचा समावेश ब वर्ग पर्यटनस्थळात होण्यासाठी प्रयत्न केले जात आहे. 

दरम्यान, मंदिरात भाविकांसाठी दानपेटी बसविली आहे. दरमहा ही दानपेटी उघडली जाते. देवस्थान स्थानिक सल्लागार समितीचे पदाधिकारी ग्रामस्थांच्या उपस्थितीत ही दानपेटी उघडतात. शुक्रवारी (ता.17) ही दानपेटी सर्वांच्या उपस्थितीत उघडण्यात आली. त्यावेळी दानपेटीत अन्य रक्कमेबरोबरच परकिय चलन आढळले. विशेष म्हणजे अमेरिका आणि बेहरिन या दोन देशांची दोन नाणी मिळाली आहेत. दानपेटीतील परदेशी नाणी पाहून समितीचे पदाधिकारीही आश्‍चर्यचकित झाले. दानपेटीत प्रथमच अशा प्रकारे परकिय चलन मिळाले आहे. त्यामुळे हा विषय भाविकांमध्ये चर्चेचा झाला आहे.