कोल्हापूर : सोशल मीडियावर शुभेच्छा देत व सामाजिक उपक्रम करत "व्हॅलेंटाईन डे' आज साजरा झाला. अनेकांचे डीपी व स्टेटस प्रेमाच्या संदेश देत सजले. रक्तदान करत तरूणाईने सामाजिक बांधिलकी जपली. 

"व्हॅलेंटाईन डे'चे सेलिब्रेशन जोरदार झाले. मित्र-मैत्रिणींनी एकमेकांना शुभेच्छा दिल्या. ग्रिटिंग्ज पाठवूनही मनातल्या भावना व्यक्त करण्यात आल्या. आई, वडिल, भाऊ, बहिणीवरील प्रेमाचा धागा अतूट असल्याची प्रचिती देण्यात आली. फेसबूकवर व्हॅलेंटाईन डेच्या शुभेच्छा अनेकांनी देत कविता, शायरीच्या ओळीही झळकविल्या होत्या. "व्हॅलेंटाईन डे'ची माहिती सांगणारे मेसेजही व्हॉटसऍपद्वारे दिवसभर फिरत राहिले. शहरातील हॉटेल्समध्ये कॅंडल डीनरचा आनंद अनेकांनी लुटला. शालेय व महाविद्यालयांनी एकत्र येऊन जुन्या आठवणींना उजाळा दिला. 

युवा ऑर्गनायझेशनतर्फे राजारामपुरीतील राजाराम गार्डनमध्ये रक्तदान शिबिर झाले. यात 521 रक्तदात्यांनी रक्तदान केले. उपक्रमाचे यंदाचे पंधरावे वर्ष होते. सोनल शिर्के, सत्यजित जाधव, विक्रम आमले, मंदार तपकिरे, सुमंत खराडे, अनकेत कोरगावकर, अभिजित पसारे, रोहित देसाई, अनंत चौगुले, मुदृल शहा, कौस्तुभ कोतमिरे यांनी संयोजन केले. 
इंडियन मार्शल आर्ट थांग-ता असोसिएशनतर्फे कसबा बावड्यातील ऊसतोड शेजमजुरांना कपडे व त्यांच्या मुलांना खाऊ वाटप करण्यात आले. सुमारे पस्तीस कुटुंबियांना कपडे देण्यात आली. या वेळी सचिव सतीश वडणगेकर, माजी नगरसेवक अफजल पिरजादे, मोहन ढवळे, आकाश माडगूळकर, निखिल मोरे, अमोल पाटोळे, महादेव देवाडकर, संजय देवाडिगा उपस्थित होते.