गडहिंग्लज : चिंचेवाडी (ता. गडहिंग्लज) येथे विवाहितेला फिनेलसदृश औषध पाजल्याची घटना घडली. गौतमी रोहित कांबळे (वय २३) असे उपचार सुरु असलेल्या विवाहितेचे नाव आहे. त्यांची प्रकृती चिंताजनक आहे. त्यांनी दिलेल्या जबाबावरुन पतीसह तिघांना अटक करण्यात आली आहे.

पती रोहित भीमराव कांबळे (वय २१), सासू रेखा भीमराव कांबळे (वय ४५) व सासरा भीमराव बाबू कांबळे (वय ५२) अशी संशयितांची नावे आहेत. गौतमी कांबळे यांना गुरुवारी (ता.७) येथील खासगी रुग्णालयात उपचारासाठी दाखल केले होते.

त्यावेळी त्यांनी नजरचुकीने फिनेल पिल्याचे सांगितले होते. दरम्यान, वैद्यकीय अधिकाऱ्यांनी त्यांची प्रकृती चिंताजनक झाल्याचे पोलिसांना कळविले. त्यामुळे त्यांचा जबाब नोंदविण्याचा आदेश देण्यात आला. निवासी नायब तहसीलदार विष्णू बुट्टे यांनी हा जबाब घेतला.

बुधवारी (ता.६) रात्री दहाच्या सुमारास पती रोहित याच्याकडे कपडे घेण्यासाठी दोन हजार रुपये मागितले म्हणून राहुलसह सासू रेखा व सासरा भिमराव यांनी फिनेलसदृश औषध जबरदस्तीने पाजल्याचा जबाब गौतमी यांनी दिला आहे. औषध पिण्यास नकार दिल्यानंतर मारहाण केली व जीवे मारण्याची धमकीही दिल्याचे जबाबात म्हटले आहे. गौतमी यांच्या जबाबावरुन रोहित, रेखा व भीमराव यांच्यावर गुन्हा दाखल झाला असून त्यांना अटक केली आहे.