इचलकरंजी : अवकाळी पावसाच्या तडाख्यात सापडल्याने हवालदिल झालेल्या शेतकऱ्यांना दसऱ्यामुळे अच्छे दिन आले. यंदाच्या दसऱ्याला झेंडूला विक्रमी दर मिळाल्याने शेतकऱ्यांतून समाधान व्यक्त झाले. सकाळी 80 ते 100 रूपये प्रतिकिलो झेंडूचा भाव होता. दुपार सरली तसा भाव चांगलाच कडाडला. दुपारी झेंडूच्या दराने 200 गाठले आणि सायंकाळी प्रतिकिलो दर 250 ते 300 रूपये होता. 

दसऱ्याचा बाजार म्हणजे झेंडू फुलाला अधिक महत्व असते. मात्र यावर्षी परतीच्या पावसाचा फटका फुल शेतीला बसला. त्यामुळे ऐन दसऱ्याच्या तोंडावर फुल उत्पादनातून स्थिरावणारे शेतकरी हवालदिल झाले होते. परंतु शेतकऱ्यांनी हार न मानता पावसातून उरल्या सुरल्या हातासरशी आलेल्या झेंडूच्या शेतीत चांगले नियोजन केले. दसऱ्याला खंडेनवमीसाठी घरोघरी, कार्यालयात झेंडू फुलांना मागणी असते. यंदा बाजारात फुलांची आवक कमी प्रमाणात झाल्यामुळे झेंडूला तेजी आली. याचा फायदा झेंडू उत्पादक शेतकऱ्यांना झाला. 

बाजारात यंदा झेंडूची कमी झालेली आवक, मागणीची पुर्तता न होण्यासारखी होती. झेंडू विक्रेत्यांची संख्याही कमी होती. शहरातील ठिकठिकाणी किरकोळ विक्रेते विक्री करताना दिसत होते. 

उत्तम दर मिळाल्याने समाधान
पावसाने झेंडू फुलशेती नुकसानीला बळी पडली. दसऱ्याच्या पार्श्‍वभूमीवर जोमाने कामाला लागून उत्तम नियोजन केले. उत्तम दर मिळाल्याने समाधान आले. पहिल्यांदाच झेंडूमुळे चांगला नफा मिळाला. 
- शुभम यादव, शेतकरी 

संपादन - सचिन चराटी

kolhapur