इचलकरंजी (कोल्हापूर)  : शहरात आज कोरोना रूग्णांच्या संख्येने शतक पार केले. सोलगे मळा येथील नवीन तीन रुग्ण आज पॉझिटिव्ह आले. त्यामुळे रुग्णांची संख्या १०१ वर पोहोचली आहेृ दुसरीकडे कोरोना मुक्त होणाऱ्या रुग्णांची संख्याही वाढत असल्याने दिलासादायक बाब पुढे येत आहे.

 शहरात गेल्या पंधरा दिवसात कोरोनाने कहरच केला आहे. दररोज रुग्णांची संख्या झपाट्याने वाढत आहे. कुडचे मळा येथे सामूहिक संसर्गाला सुरुवात झाल्यानंतर आज शहरातील विविध भागात कोरोनाचे रुग्ण आढळून येत आहेत. शहरातील विविध भागात ३० पेक्षा अधिक प्रतिबंधित क्षेत्र तयार करण्यात आले आहेत. शहरात सरासरी दररोज सहा ते सात रुग्ण आढळून येत आहेत. कोरोना संसर्गाची साखळी तोडण्यासाठी प्रशासनाकडून प्रयत्न सुरू आहेत. घर टू घर सर्व्हे करून संशयास्पद रुग्णांची माहिती घेतली जात आहे.  विविध भागात औषध फवारणी करून निर्जंतुकीकरण केले जात आहे. संसर्ग टाळण्यासाठी गेली चार दिवस शहरात शंभर टक्के लॉक डाऊन जाहीर करण्यात आले आहे. १४ जुलैपर्यंत शहर शंभर टक्के लॉक डाऊन राहणार आहे.

हेही वाचा - राजापूर मधील एक वयोवृद्ध आपल्या मुलासह पाठीच्या उपचारासाठी कोल्हापूरला आला अन्.... -

 दरम्यान, आज सोलगे मळ्यातील नवीन तीन रुग्ण आढळून आले आहेत. यापूर्वीच या भागातील दोन रुग्ण कोरोना बाधित झाले आहेत. त्यांच्या संपर्कातील तिघांना संसर्ग झाल्याचे  प्रशासनाकडून सांगण्यात आले. त्यामुळे शहरातील कोरोना रुग्णांच्या संख्येने आज शंभरी पार केली आहे. रुग्णांची संख्या १०१ वर पोहचली आहे. तर आतापर्यंत शहरातील एका तरुणांसह नऊ जणांचा मृत्यू झाला आहे.

हेही वाचा - करंजफेण हादरले : एकाच वेळी व एकाच कुटुंबातील एवढेजण  झाले बाधित -

पोलीस अधिकारी निगेटिव्ह

लॉक डाऊन  करण्यासाठी शहर सनियंत्रण समितीने आयोजित बैठकीस उपस्थीत असलेल्या माजी नगरसेवकास कोरोनाचा संसर्ग झाला होता. त्यामुळे सर्व उपस्थितांना १४ दिवस होम क्वारंटाईन करण्याचा आदेश प्रशासनाकडून देण्यात आला होता. यातील तीन पोलिस अधिकाऱ्यांसह एका कर्मचार्‍याचा स्वॅब तपासणीसाठी देण्यात आला होता. या चौघांचाही अहवाल निगेटिव्ह आल्याने मोठा दिलासा मिळाला आहे.

संपादन - अर्चना बनगे