कोल्हापूर : कोल्हापूर-सांगली जिल्ह्यातील पूरग्रस्त आणि शेतकऱ्यांना आठ दिवसांत मदत मिळाली नाही तर 1 सप्टेंबर 2021 ला हजारो कार्यकर्त्यांसह नृसिंहवाडी येथे जलसमाधी घेण्याचा इशारा स्वाभिमानी शेतकरी संघटनेचे संस्थापक आणि माजी खासदार राजू शेट्टी यांनी आज दिला. पूरग्रस्तांना तातडीने मदत निधी मिळावा, पुरामध्ये नुकसान झालेल्या शेतकऱ्यांना कर्ज माफी मिळावी तसेच शेतकऱ्यांना ही 50 हजार रुपयांचा निधी मिळावा यासाठी आज स्वाभिमानी शेतकरी संघटनेच्या वतीने आक्रोश मोर्चा काढण्यात आला यावेळी ते बोलत होते.

पूरग्रस्तांना न्याय मिळावा यासाठी केलेल्या आक्रोश आंदोलनात आज असंख्य महिला आणि पुरुष सहभागी झाले होते. आम्हाला नाही मिळालाच पाहिजे, या सरकारचं करायचे काय खाली डोकं वर पाय, अशा घोषणा देत परिसर दणाणून सोडला.

अशा आहेत मागण्या

• 2019 च्या धर्तीवर पूरग्रस्त शेतकऱ्यांची संपूर्ण कर्जमाफी करा

• पूरग्रस्तांच्या मागणीप्रमाणे विनाअट पुनर्वसन करा

• कृष्णा व पंचगंगा आदी नद्यांच्या मार्गावर असलेल्या पुलाजवळचा भराव कमी करून तातडीने कमानी पुल बांध

• पूरग्रस्त भागातील विद्यार्थ्यांची सरसकट ही तसेच शैक्षणिक कर्ज माफी करा.

• 2005 ते 2019 पर्यंत चार मोठे महापूर आले या महापुरामुळे नदीकाठची अनेक गावे उध्वस्त झाली‌ आहेत. यावर कायमस्वरूपी उपाययोजना करण्यासाठी तातडीने अभ्यासगट नेमून त्यावर त्वरित अंमलबजावणी करावी.