जोतिबा डोंगर - श्री क्षेत्र जोतिबा (Jotiba) देवाच्या चैत्र यात्रेचा (Chitra Yatra) मुख्य दिवस शनिवार (ता. १६) असला तरी आज कामदा एकादशीच्या मुहूर्तावर जोतिबा चैत्र यात्रेस पारंपरिक पद्धतीने प्रारंभ (Start) झाला. राज्यभरातून भाविक (Divotee) येण्यास सुरुवात झाली. आज सकाळी गायमुख तलावमार्गे दक्षिण दरवाजातून बेळगावचे भाविक आले. अन्य राज्यांच्या भाविकांनी डोंगरावर हजेरी लावली. सात दिवस पायपीट करून बैलगाडी घेऊन आलेल्या कर्नाटकातील भाविकांचेही आगमन झाले.

आज आलेल्या भाविकांचे ग्रामस्थ पुजारी व देवस्थान समितीच्या वतीने मानाचा विडा देऊन स्वागत केले. जोतिबाच्या नावानं चांगभलंचा जयघोष झाला. भाविकांनी मंदिरांच्या शिखरावर गुलाल खोबऱ्याची उधळण केली. बेळगाव येथील भाविकांनी पाण्याची टाकी नवीन वसाहतीमध्ये राहण्याची जागा केली. काहींनी पाण्याची टाकी शेजारच्या रस्त्याकडेला बैलगाड्या सोडून आडोसा केला. आज सोलापूर, आंबेजोगाई, परळी, बीड, तुळजापूर, नंदूरबार या भागांतील भाविक सासनकाठीसह दाखल झाले. हलगी पिपाणी सनईच्या सुरात वाजत मंदिरात आणली. चांगभलचा त्यांनी अखंड जयघोष केल्यामुळे मंदिर परिसर दणाणून गेला. भाविक गुलालात न्हाऊन गेलेत. आज कामदा एकादशीच्या निमित्ताने दुपारी श्री जोतिबा देवाची विठ्ठल रूपातील महापूजा मधुकर सांगळे, अंकुश दादर्णे, बाळकृष्ण सांगळे, नितीन लादे यांनी ही महापूजा बांधली.

सीसीटीव्हीची नजर

चैत्र यात्रेत मंदिर व परिसराचे चित्रण करण्यासाठी देवस्थान समितीने सीसीटीव्ही यंत्रणा बसविली आहे. त्यामुळे घातपाताच्या घटनांना आळा बसणार आहे.

शुक्रवारपासून अवजड वाहने बंद

चैत्र यात्रा काळात शुक्रवार ते सोमवारपर्यंत अवजड वाहनांना बंदी घातली आहे. डोंगरावर जाणारी ट्रक, तीन चाकी प्रवासी व मालवाहतूक रिक्षा तसेच ट्रॅक्टरला बंदी घातली आहे.

शासकीय यंत्रणा डोंगरावर

डोंगरावरील कामे मार्गी लावण्यासाठी गटविकास अधिकारी, तीन विस्तार अधिकारी, सरपंच, उपसरपंच ग्रामपंचायत पदाधिकारी, ग्रामविकास अधिकारी, ग्रामसेवक, देवस्थानचे सचिव, अधीक्षक, पोलिस परिश्रम घेत आहेत.

पार्किंग सज्ज

वाहन पार्किंगची व्यवस्था शासकीय विश्रागृहासमोर, यमाई मंदिर परिसर, चव्हाण तळे परिसर तसेच डोंगराच्या पायथ्याशी असणाऱ्या रिकाम्या जागेत केली आहे.