कोल्हापूर : उपमुख्यमंत्री अजित पवार यांच्या प्रमुख उपस्थितीत रविवारी (ता. १०) तपोवन मैदानावर उत्तरदायित्व सभा होणार आहे. या सभेला रेकॉर्ड ब्रेक गर्दी होईल, अशी माहिती राष्ट्रवादी काँग्रेस अजित पवार (Ajit Pawar) गटाचे जिल्हाध्यक्ष ए. वाय. पाटील यांनी दिली.

तपोवन मैदानावर सभास्थळी आयोजित पत्रकार परिषदेत ते बोलत होते. पाटील म्हणाले, ‘कावळा नाका येथे दुपारी साडेतीनला अजित पवार यांचे छत्रपती ताराराणी पुतळ्याजवळ स्वागत होईल. तेथून ते दसरा चौकातील छत्रपती शाहू महाराज, छत्रपती शिवाजी महाराज यांच्या पुतळ्याला अभिवादन करतील.

तेथून पुढे ऐतिहासिक बिंदू चौकातील भारतरत्न डॉ. बाबासाहेब आंबेडकर आणि महात्मा ज्योतिराव फुले यांच्या पुतळ्यांना अभिवादन करतील. त्यानंतर मिरजकर तिकटीवरून पुढे ही मिरवणूक तपोवन मैदानावर येईल. त्यानंतर सभेला प्रारंभ होईल.’

सभास्थळी पश्चिम बाजूच्या मैदानावर पार्किंगची व्यवस्था, पिण्याच्या पाण्याची व्यवस्था, सभामंडपामध्ये पूर्व बाजूला पुरुष आणि पश्चिम बाजूला महिला अशी बैठक व्यवस्था असेल. ‘जागो हिंदुस्तानी’ हा राष्ट्रभक्तीपर कार्यक्रमही यावेळी सादर होईल.

राज्य महिला आयोगाच्या अध्यक्षा रूपाली चाकणकर, विधानसभा सभापती नरहरी झिरवाळ, रामराजे निंबाळकर, आमदार मकरंद पाटील आदींची उपस्थिती असेल. वैद्यकीय शिक्षण मंत्री हसन मुश्रीफ यांच्या मार्गदर्शनाखाली ही सभा होणार असून सभेला ‘काम बोलतय..’ ही टॅगलाईन दिली असल्याचेही पाटील म्हणाले.

यावेळी शहराध्यक्ष आदिल फरास, स्थायी समितीचे माजी सभापती राजेश लाटकर, जिल्हा दूध संघाचे संचालक नवीद मुश्रीफ, जिल्हा बँकेचे संचालक प्रताप उर्फ भैय्या माने, महेंद्र चव्हाण, निखिल कोराणे, बाबासाहेब पाटील- आसुर्लेकर, मनोज फराकटे, विकास पाटील आदी उपस्थित होते. दरम्यान, जिल्हा पोलिस अधीक्षक महेंद्र पंडित यांनी सभास्थळाला भेट देऊन मैदानाची पाहणी केली.