ऊसतोड मुकादमावर गुन्हा दाखल

इचलकरंजी : ऊसतोड मजूर पुरवण्याच्या नावाखाली ७ लाख २० हजार रुपयांची फसवणूक केल्याप्रकरणी एकावर शहापूर पोलिस ठाण्यात गुन्हा दाखल झाला आहे. अण्णासो सुभाष हजारे (वय ३१, रा. वाडेगाव, ता. सांगोला) असे त्याचे नाव आहे. याबाबतची फिर्याद सर्जेराव माने (वय ५४, रा.खोतवाडी) यांनी पोलिसांत दिली. पाच वर्षांपूर्वी हजारे याने उसतोड मजुराच्या नऊ जोड्या देतो, असे सांगत माने यांचा विश्वास संपादन केला. यासाठी त्याने रोख ६० हजार रुपये तसेच बँक व्यवहारामार्फत ६ लाख ६० हजार रुपये इतकी रक्कम असे एकूण ७ लाख २० हजार रुपये घेतले. मात्र त्याने उसतोड मजूर पुरवले नाहीत आणि पैसेही परत दिले नाहीत. त्यामुळे माने यांच्या फिर्यादीनुसार अण्णासो हजारे याच्यावर शहापूर पोलिसांनी फसवणुकीचा गुन्हा दाखल केला आहे.