सोळांकूर रुग्णालयाची
सहसंचालकांकडून पाहणी

सोळांकूर ः येथील ग्रामीण रुग्णालय येथे आरोग्य सेवा आयुक्तालय, मुंबईच्या सहसंचालक सुनीता गोल्हाईत यांनी भेट देऊन रुग्णालयाच्या कामकाजाची व विकासकामांची पाहणी केली. त्यांनी रुग्णालयाच्या नवीन इमारतीच्या बांधकामाची, तसेच आरोग्य सुविधांची पाहणी करून रुग्णसेवेचा आढावा घेतला. ग्रामीण रुग्णालयात उपलब्ध साधनसुविधांचा प्रभावी वापर करून मोठ्या आणि गुंतागुंतीच्या शस्त्रक्रिया यशस्वीपणे केल्या जात असल्याबद्दल गोल्हाईत यांनी वैद्यकीय अधीक्षक, वैद्यकीय अधिकारी आणि कर्मचाऱ्यांचे अभिनंदन केले. आयुष विभागाचे नावीन्यपूर्ण उपक्रम आणि आर. बी. एस. के. पथकाच्या कामाचेही त्यांनी कौतुक केले. यावेळी जिल्हा शल्यचिकित्सक डॉ. सरिता थोरात, वैद्यकीय अधीक्षक डॉ. ज्योती कोले, डॉ. अजित शिंदे, डॉ. प्रताप नाळे, डॉ. विनायक लोहार, डॉ. रेखा लोहार, डॉ. सुदर्शन खराटे उपस्थित होते.