दहिवडी - माढा लोकसभा मतदारसंघात विजयश्री खेचून आणण्यासाठी ‘घड्याळ’ व ‘कमळा’त अटीतटीची लढाई सुरू आहे. मात्र, त्याच वेळी खाट, तंबू, चावी, हत्ती व ऊस घेतलेला शेतकरी दोघांचे गणित बिघडविण्यासाठी सज्ज आहेत. माढा मतदारसंघाकडे सर्वांचे लक्ष लागून राहिलेले आहे.

माढा मतदारसंघात एकूण ३१ उमेदवार निवडणुकीच्या मैदानात आहेत. मुख्य लढत ‘राष्ट्रवादी’चे संजय शिंदे यांचे ‘घड्याळ’ व भाजपच्या रणजितसिंह नाईक- निंबाळकर यांच्या ‘कमळ’ यांच्यातच आहे. मात्र, हत्ती हे चिन्ह असलेले बसपाचे अप्पा लोकरे, खाट हे चिन्ह असलेले बहुजन मुक्ती पार्टी या पक्षाकडून लढणारे वेळापूरचे सुनील ऊर्फ काकासाहेब जाधव, तंबू हे चिन्ह असलेले अपक्ष लढणारे शिरूरचे दौलत शितोळे, चावी हे चिन्ह असलेले वंचित बहुजन आघाडीकडून लढणारे बारामतीचे ॲड. विजय मोरे व ऊस हातात घेतलेला शेतकरी हे चिन्ह असलेले अपक्ष लढणारे पिलीवचे सचिन पडळकर हे उमेदवार प्रबळ दावेदार असलेल्या शिंदे व निंबाळकर यांची गणिते बिघडविण्याची शक्‍यता आहे.

सन २०१४ च्या लोकसभा निवडणुकीत बसपाच्या हत्तीने १५ हजार ७९० मते घेतली होती. या वेळी बसपा आपली पारंपरिक मते घेण्यात यशस्वी ठरतो, की ती मते ‘वंचित’कडे जाणार हे पाहणे औत्सुक्‍याचे ठरणार आहे.

यावर्षी बहुजन मुक्ती पार्टीकडून लढणाऱ्या काकासाहेब जाधव यांनी २०१४ मध्ये अपक्ष लढताना आठ हजार मते घेतलेली होती. मागील पाच वर्षांत त्यांनी मोठ्या प्रमाणात संघटनात्मक काम केले आहे. त्यामुळे या वेळी वाढीव मतांची त्यांना आशा आहे. शितोळे व पडळकर हे अनुक्रमे रामोशी व धनगर समाजाची बऱ्यापैकी मते घेतील, अशी चिन्हे आहेत, तर सध्या सर्व महाराष्ट्रात हवा निर्माण करण्यात यशस्वी ठरलेली वंचित बहुजन आघाडी माढ्यातही आपले अस्तित्व दाखविण्यास सज्ज झाली आहे. ‘वंचित’च्या उमेदवाराची भिस्त ही सोशल इंजिनिअरिंगवर आहे. बौद्ध, मागासवर्गीय, धनगर, मुस्लिम व इतर अल्पसंख्याक समाजाची मते प्रकाश आंबेडकरांच्या नेतृत्वामुळे ‘वंचित’ला मिळतील अशी ‘वंचित’च्या कार्यकर्त्यांना खात्री आहे.