सांगली / वारणावती : चांदोली धरण (Chandoli Dam) पाणलोट क्षेत्रात मुसळधार पावसाचा जोर कायम आहे. त्यामुळं काल दुपारी धरणाचे उर्वरित दोन्ही दरवाजे खुले केले असून, सध्या धरणाच्या चारीही दरवाजातून वारणा नदी (Warna River) पात्रात विसर्ग सुरू केला आहे.

सांगली शहर व जिल्ह्यात काल दिवसभर पावसाने मुक्काम ठोकला. थांबून थांबून हलक्या व मध्यम सरी कोसळत राहिल्या. त्यामुळे बाजारपेठेसह सगळीकडेच तारांबळ उडाली. कृष्णा नदीच्या (Krishna River) पातळीत कोणतीही वाढ झाली नाही, मात्र कोयना धरणातून काल सायंकाळी विसर्ग वाढविण्यात आला असून तो १०५० वरून २१०० क्युसेक केला आहे.

कोयनेतून कर्नाटकने आलमट्टी धरणातील साठ्यातील वेगवान वाढ लक्षात घेऊन कालपासून विसर्ग वाढवण्यास सुरुवात केली होती. काल दुपारपासून तो १ लाख ७५ हजार क्युसेक केला. या पावसाळ्यात आज सर्वाधिक पाऊस झाला. त्यामुळे सांगली शहरात सगळीकडे लोकांची तारांबळ उडालेली दिसली.

आलमट्टीतून विसर्ग दीड लाखावर

बेळगाव : आलमट्टी धरणातून गुरुवारी (ता. २७) सायंकाळी ६.३० वाजता १ लाख ७५ हजार क्युसेकने पाण्याचा विसर्ग सुरू करण्यात आला आहे. धरणात ८९.८०० टीएमसी पाणी साठा झाला असून, आवक १ लाख ६५ हजार ८३३ क्युसेक इतकी आहे. धरण ७२.९६ टक्के भरले आहे. विसर्ग वाढविल्यामुळे कोल्हापूर, सांगलीला तूर्तास दिलासा मिळाला आहे.