उंब्रज (ता. कऱ्हाड, जि. सातारा): येथे सुरु असलेले दुसऱ्या त्रिवेणी साहित्य संमेलनाला ग्रंथदिंडीने मोठया उत्साहात प्रारंभ झाला. यावेळी परिसरातील शाळेच्या विदयार्थी-विदयार्थीनी हजारोच्या सहभागी झालेने गावातून काढलेली फेरी ही अभूतपूर्व झाली. येथील महात्मा गांधी विद्यालय प्रांगणात संमेलन भरले आहे. अनेक मान्यवरांच्या उपस्थीतीत ग्रंथदिंडीचे पूजन झाले. त्यानंतर ग्रंथदिंडीस प्रारंभ झाला.

ग्रंथदिडींत गांधी विदयालय, महिला महाविद्यालय, कन्या शाळा, यशवंतराव जाधव विद्यालय, होली कॉनव्हेनट स्कूल, ग्लोबल इंग्लीश मेडियम स्कूल, आदर्श शाळा, जिल्हा परिषद शाळा सहभागी झाल्या होत्या. लेझिम पथक, वारकरी संप्रदाय टाळ मृदुंगाचा गजर करीत हरी नामाचा गजर सुरू होता त्यामुळे वातावरण भक्तीमय झाले होते. त्यापाठोपाठ पारंपारिक वेषभूषेतील विदयार्थी होते. महिला महाविद्यालयाच्या युवती घोडे स्वार होऊन राणी लक्ष्मीबाई, राजमाता जिजाऊ, अशा वेगवेगळया वेषभूषा करून घोडयावर स्वार झाल्या होत्या. यामध्ये वेगवेगळया साहित्याविषयी माहिती करून देणारे फलक, तसेच स्वावलंबी शिक्षण हेच आमचे ब्रीद, वृक्ष संवर्धनाचे संदेश, लेक वाचवा या संदेशाचे फलक, झळकत होते. फेरी सुरभी चौकातून सरळ माणिक चौक मार्गे शिवाजी महाराज पुतळया नजीक आली. त्यावेळी शिवाजी महाराज पुतळयासमोर युवतींनी लेझिम पथक सादर केले. त्यानंतर भव्य दिव्य साहित्य संमेलनासाठी तयार करण्यात आलेला मंडप हा विदयार्थी विदयार्थीनी भरगच्च भरून गेला. यावेळी साहित्य संमेलनाच्या पहिल्या दिवशीच्या कार्यक्रमास सुरवात झाली. यामध्ये प्रास्ताविक संजय पाटील यांनी करत कार्यक्रमास सुरवात केली.

कार्यक्रमाच्या अध्यक्षस्थानी शशिकला जाधव या होत्या. यावेळी सुरवातीलाच सावित्रीबाई फुले यांचे जीवन व कार्य या विषयावर व्याख्यान करून सुनिता जाधवने उस्फूर्त दाद मिळवली. यावेळी आभार सुरेश साळुंखे यांनी मानले.