सोलापूर : महापालिकेच्या उद्यान कार्यालय परिसरात स्मार्ट उद्यानाची उभारणी करण्यात येणार आहे. त्यासाठी 4.34 कोटींचा आराखडा तयार करण्यात आला असून, 11 प्रकारच्या सुविधा त्या ठिकाणी करण्यात येणार आहेत. त्याची सुरुवात झाली आहे.

स्मार्ट सिटी डेव्हलपमेंट कार्पोरेशनच्या संचालक मंडळाच्या बैठकीत या कामाला मंजुरी देण्यात आली आहे. निखिल कन्स्ट्रक्‍शन ही कंपनी हा परिसर विकसित करणार आहे. त्यासाठी सहा महिन्यांची मुदत देण्यात आली आहे. 

या ठिकाणी महापालिकेची नर्सरी करण्यात येणार आहे. याशिवाय, रेन वॉटर हार्वेस्टिंगचे मॉडेल तयार करण्यात येणार आहे. तसेच थीम पार्क, लॅंडस्केप विकसित करणे, साहसी खेळ, पदपथ, रेस्टॉरंट, मुलांना खेळण्यासाठी स्वतंत्र जागा आरक्षित करण्यात आली आहे. याशिवाय उद्यानात आकर्षक पद्धतीचे दिवे लावण्यात येणार आहेत. ऍम्फी थिएटर, गार्डन बेंच आणि स्वच्छतागृहाचीही सुविधा या ठिकाणी केली जाणार आहे. 

चार ठिकाणी ट्रान्सफर स्टेशन 
शहरात जमा झालेला कचरा संकलित करण्यासाटी चार ठिकाणी ट्रान्सफर स्टेशनची उभारणी करण्यात येणार आहे. त्यासाठी दोन हुक लोडर आणि आठ मोबाईल कॉम्पॅक्‍टर खरेदी केले जाणार आहेत.