अक्कलकोट (सोलापूर) : अक्कलकोट तालुक्‍यातून (akkalkot taluka) चालू वर्षाच्या खरीप हंगामासाठी (kharif sowing) 85650 हेक्‍टर पेरणीचे उद्दिष्ट ठेवण्यात आल्याची माहिती तालुका कृषी अधिकारी सूर्यकांत वडखेलकर यांनी "सकाळ'शी बोलताना दिली आहे. (preparation for kharif sowing have started from akkalkot taluka)

चालू हंगामात अक्कलकोट तालुक्‍यातील वागदरी, मैंदर्गी, किणी नागणसुर जेऊर, करजगी व तडवळ, मैंदर्गी, दुधनी या भागात पूर्वमौसमी पाऊस मध्यम स्वरूपाचा झाला आहे. त्याने खरीपपूर्व मशागत चांगली होण्यास मदत झाली आहे. यामुळे आता खरीप पेरणीची तयारी सुरू असून वेळेवर पाऊस सुरू होणे आवश्‍यक आहे.

अक्कलकोट तालुक्‍यातील मुख्य पिके ही खरीप हंगामात जास्त घेतली जातात. उन्हाळ्यात केलेली नांगरणी नंतर आता पेरणीचे दिवस आता आठवडभरात येत आहेत. त्याने शेतकरी बंधू कुळवणी, बियाणांची निवड तसेच खतांची खरेदी आदी कामे करत आहेत. आता येत्या चार पाच दिवसात मोठा पाऊस झाल्यास पुरेशी ओल होऊन पेरणी सुरू होण्याच्या कोणत्याही अडचणी येणार नाहीत.

अक्कलकोट तालुक्‍यात खरीप हंगामात तूर 32000 हेक्‍टर , उडीद 19500 हेक्‍टर, मूग 7000 हेक्‍टर, सोयाबीन 4500 हेक्‍टर, सूर्यफूल 4100 हेक्‍टर, कांदा 1000 हेक्‍टर, ऊस 12500 हेक्‍टर असे एकूण 85650 हेक्‍टर क्षेत्रावर पिकांचे उद्दिष्ट अपेक्षित आहे.

खरीप हंगामात येणाऱ्या संभाव्य अडचणी जे पाहिजे ते बियाणे वेळेवर उपलब्ध न होणे, खतांची कृत्रिम टंचाई होणे अथवा जादा दराने विक्री करणे, जास्त नफा देणाऱ्या निविष्ठांचा विक्रीवर भर देणे, पावसातील नेहमीप्रमाणे असणारी अनियमितता मजुरांची नेमक्‍या कामावेळी भासणारी टंचाई खरीप पीक विमांची नोंदणी वेळेवर सुरु न करणे.

"अक्कलकोट तालुक्‍यात तूर हे प्रमुख पीक असल्याने शेतकऱ्यांनी पेरणी पूर्वी व रासायनिक व जैविक बीज प्रक्रिया करूनच बियाणे पेरणी करावी. त्यामुळे बियांपासून होणारे रोग कमी होतात व खताची बचत होते. सोयाबीनची पेरणी पुरेसा पाऊस झाल्यानंतरच करावी. बियाण्याची उगवण तपासणी करून पेरणी करावी. सोयाबीनची फार खोलवर पेरणी करू नये."

- सूर्यकांत वडखेलकर, तालुका कृषी अधिकारी, अक्कलकोट

(preparation for kharif sowing have started from akkalkot taluka)