माढा - माढा लोकसभा मतदारसंघातील भारतीय जनता पक्षाचे उमेदवार रणजितसिंह नाईक-निंबाळकर यांनी माढ्यामध्ये काँग्रेसचे माजी आमदार धनाजीराव साठे व जिल्हा संघाचे माजी संचालक राजेंद्र चवरे यांची भेट घेतली असून निंबाळकरांचा माढ्यातील भेटीगाठीचा सिलसिला वाढलेला आहे.

भारतीय जनता पार्टीचे माढा लोकसभा मतदारसंघाचे उमेदवार रणजितसिंह नाईक-निंबाळकर यांनी त्यांच्या उमेदवारीला मोहिते-पाटील समर्थकांचे होणारा वाढता विरोध पाहता माढा लोकसभा मतदारसंघातील भेटीगाठींवर भर दिलेला आहे. नुकतीच त्यांनी शिवसेना शिंदे गटाचे जिल्हा संपर्कप्रमुख प्रा. शिवाजीराव सावंत व त्यांच्या कार्यकर्त्यांची भेट घेऊन त्यांची नाराजी दूर करण्याचा प्रयत्न केला.

तर नाईक-निंबाळकर यांचे समर्थक असणारे जिल्हा दूध संघाचे माजी संचालक राजेंद्र चवरे यांचीही रणजितसिंह नाईक - निंबाळकर यांनी सोमवारी (ता. १) भेट घेतली असून श्री. चवरे यांची ही तिसरी भेट आहे. याशिवाय काँग्रेसचे माजी आमदार अॅड. धनाजीराव साठे यांची रणजितसिंह नाईक-निंबाळकर यांनी ता. १ रोजी भेट घेतली असून निंबाळकर यांच्या माढ्यातील भेटीगाठी वाढल्या असून महायुती व महाआघाडीतील नेत्यांनाही ते भेटत असल्याने नेमक्या कोणत्या राजकीय चर्चा होतात व तालुक्यात महायुती व महासिकास आघाडीत नेमक्या कोणत्या घडामोडी होतात याबाबत राजकीय वर्तुळात तर्कवितर्क काढले जात आहेत.

साठे-निंबाळकर दुसरी भेट

काँग्रेसचे माजी आमदार धनाजीराव साठे यांचा ता. १ रोजी वाढदिवस असल्याने कदाचित वाढदिवसाच्या शुभेच्छा देण्याच्या निमित्ताने निंबाळकर यांनी अॅड. साठे यांची भेट घेतली असावी, अशी चर्चा. मात्र मागील काही दिवसांतील साठे व निंबाळकर यांच्यातील ही दुसरी भेट आहे. त्यामुळे या भेटीमध्ये नेमक्या कोणत्या राजकीय चर्चा होतात. याबाबत उत्सुकता असून निंबाळकरांचा हा भेटीचा सिलसिला वाढत चाललेला आहे.