टेंभुर्णी : विठ्ठलराव शिंदे सहकारी साखर कारखान्याचे युनिट नंबर 1 पिंपळनेर व युनिट नंबर 2 करकंब या कारखान्याने सन 2023-24 गळीत हंगामामध्ये जळीत होवून गाळपास आलेल्या ऊसाचे बिलातून कारखाना धोरणानुसार कपात केलेली संपूर्ण रक्कम संबंधित ऊस पुरवठादार शेतक-यांना परत करण्यात येणार असल्याची माहीती संस्थापक अध्यक्ष आमदार बबनराव शिंदे यांनी दिली.

आमदार बबनराव शिंदे म्हणाले की, विठ्ठलराव शिंदे सहकारी साखर कारखान्याचे युनिट नंबर1 पिंपळनेर व युनिट नंबर 2 करकंब येथील सन 2023-24 चा गळीत हंगाम नुकताच बंद झालेला आहे.या गळीत हंगामामध्ये दोन्ही युनिटकडे 1 नोव्हेंबर 2023 ते 6एप्रिल 2024 या कालावधीत ज्या ऊस पुरवठादारांचा ऊस शॉर्टसर्कीट,

नैसर्गिक आपत्ती व इतर कारणांमुळे जळीत होवून गळीतास आला आहे. त्यांचे ऊसाचे बिलातून कारखाना धोरणाप्रमाणे प्रतिटन रक्कम कपात करण्यात आली आहे. सध्या तीव्र दुष्काळी परिस्थिती निर्माण झालेली असून शेतक-यांना पिण्याचे पाणी,

जनावरांचे चा-याचा प्रश्न अत्यंत गंभीर झालेला आहे. सध्या दुष्काळी परिस्थितीमुळे शेतकरी अनेक आर्थिक अडचणींना तोंड देत आहे. अशा परिस्थितीमध्ये शेतक-यांना दिलासा देणेच्या दृष्टीने ऊस बिलातून कपात करण्यात आलेली जळीताची शंभर टक्के रक्कम ऊस पुरवठादारांना परत करण्यात येणार आहे.

जळीत ऊसाची कपात रक्कम सभासद शेतक-यांना परत मिळाल्याने त्यांना दिलासा मिळणार आहे. जळीत कपात रक्कमेमध्ये युनिट नंबर 1 पिंपळनेर येथील 3 कोटी 94 हजार रूपये व युनिट नंबर 2 करकंब येथील 90 लाख 29 हजार रूपये असे एकूण 3 कोटी 91 लाख रूपये एवढ्या रक्कमेचा समावेश आहे.

सदर जळीत ऊसाची कपात रक्कम शेतक-यांच्या बँक खात्यात येत्या दोन ते चार दिवसात वर्ग करण्यात येणार आहे. कारखाना व्यवस्थापनाने सातत्याने सभासद व ऊस पुरवठादार शेतक-यांचे हित जोपासणेचा प्रयत्न केलेला आहे.

दोन्ही युनिट कडील सन 2023 - 24 चा गळीत हंगामातील गाळपाचे उद्दिष्ठ पार पाडण्यासाठी सभासद व ऊस पुरवठादार शेतक-यांनी सहकार्य केले असून पुढील सन 2024-25 गळीत हंगाम यशस्वीरित्या पार पाडणेसाठी शेतक-यांनी जास्तीत जास्त ऊस नोंदी कारखान्याकडे द्यावेत असे आवाहन आमदार बबनराव शिंदे यांनी केले. यावेळी कारखान्याचे उपाध्यक्ष वामनराव उबाळे, कार्यकारी संचालक एस.एन दिग्रजे ,जनरल मॅनेजर एस.आर.यादव व इतर खातेप्रमुख उपस्थित होते.