श्रीरामपूर (नगर) : युवा सेना प्रमुख आदित्य ठाकरे यांची रस्त्यावर विनापरवाना सभा घेतल्याप्रकरणी पोलिसांनी युवा सेना प्रमुख निखिल अनिल पवार व मंडप मालक रंजीत सुर्यभान शेळके (रा. प्रभाग सात, श्रीरामपूर) यांच्याविरोधात पोलिसांनी गुन्हा दाखल केला आहे.

ठाकरे यांनी सुरु केलेली जन आशिर्वाद यात्रा काल (ता. २२) शहरात आली होती. त्यानिमित्त येथील आझाद मैदानासमोरील मुख्य रस्त्यावर ठाकरे यांची जाहिर सभा झाली. सभेसाठी एका बाजुने मंडप व खुर्च्या टाकून रस्ता पुर्णपणे अडविण्यात आला होता. यापुर्वी नवरात्र उत्सवात पोलिसांनी देवी मंडळांच्या कार्यकर्त्यांना मंडप उभारण्यास परवानगी नाकारण्यात आली होती. त्यावेळी आंदोलन झाले. मंडळाच्या कार्यकर्त्यांनी उत्सवावर बहिष्कार घातला होता.

काल सभेनंतर पोलिसांच्या भूमिकेवर सोशल मिडीयातून टिकेचा भडिमार झाला. त्यानंतर पोलिसांनी परवानगी नसताना रस्त्यात मंडप घालून सभा नियमांचे उल्लंघन केल्याप्रकरणी गुन्हा नोंदविला. पोलिस शिपाई राजु मेहेर यांनी याप्रकरणी शहर पोलिस ठाण्यात फिर्याद दिली.