पिंपरी - वल्लभनगर एसटी आगारातील पार्किंगमध्ये एसटी बस काढताना एअर ब्रेक न लागल्याने एसटी समोर उभ्या असलेल्या शिवशाही बसवर आदळली. यावेळी शिवशाही बसच्या समोर ऑईल चेक करण्यासाठी उभ्या असलेल्या मॅकेनीक विभागातील सहाय्यक कारागीर शिल्पा कैलास गेडाम (वय 38) या दोन्ही बसमध्ये सापडून मोठा अपघात झाला. या अपघातात त्या गंभीर जखमी होऊन त्यांचा मृत्यू झाला. ही घटना सोमवारी (दि. 8) सकाळी साडेआठच्या सुमारास घडली.

वल्लभनगर आगाराकडून मिळालेल्या माहितीनुसार, परतूर (जालना) आगाराची बस पार्किंगधून काढण्यासाठी चालक प्रयत्न करत होता. मात्र, अहमदपूर आगाराची (लातूर) बस मधातच उभी असल्याने परतूर आगाराच्या बसचा वाहक प्रशांत रमेश वाडकर हा अहमदपूर आगाराची बस बाजूला काढण्यासाठी त्या बस चालकाच्या सीटवर बसला. त्याने ती बस सुरू केली मात्र, बसमध्ये हवा कमी असल्याने ब्रेक लागलाच नाही. आणि समोर असलेल्या शिवशाही बसवर ती बस आदळली.

यामध्ये शिवशाही बसमधील ऑईलची तपासणी करणार्‍या शिल्पा या दोन्ही गाडीच्या मध्ये चेंबुन गंभिर जखमी झाल्या. त्यांना तत्काळ रुग्णालयात उपचारासाठी हलवण्यात आले. मात्र, त्यांचा उपचारादरम्यान मृत्यू झाला. या प्रकरणी वल्लभनगर आगार प्रशासनाच्या वतीने पिंपरी पोलीस ठाण्यात तक्रार देण्यात आली असून, रात्री उशिरा पर्यंत गुन्हा दाखल करण्याचे काम सुरू होते.