पिंपरी - कर्ज देतो असे सांगून १८५ जणांना लाखोंचा गंडा घालणाऱ्या तिघांना पिंपरी - चिंचवड पोलिसांच्या गुन्हे शाखा युनिट चारच्या पथकाने अटक केली. त्यांच्याकडून कोऱ्या धनादेशांसह मुद्देमाल जप्त केला आहे.

बालाजी उर्फ एकनाथ बळीराम घोडके (वय ३२, रा. यवत), संग्रामसिंह अरुणराव यादव (वय ४६, रा. अरुणोदय रेसिडेन्सी, ताराबाई पार्क , कोल्हापूर) व राजवीर उर्फ हसन अकबर मुजावर (वय ३०, रा. कसबा बावडा , जय हिंद पार्क, कोल्हापूर) अशी आरोपींची नावे आहेत. याप्रकरणी अमोल माणिकराव पाचपुते (रा. काष्टी, जि. अहमदनगर) यांनी वाकड पोलिस ठाण्यात फिर्याद दिली होती. घोडके याने हॉटेलच्या नुतनीकरणासाठी पाच कोटींचे कर्ज देतो म्हणून कर्जाची प्रोसेसिंग फीसाठी दोन लाख ४५ हजार रुपये घेतले.

मात्र, कर्ज दिले नाही. या गुन्ह्याच्या तपासादरम्यान पोलिसांनी घोडके याला ताब्यात घेतले. त्यानंतर कोल्हापूर येथून इतर आरोपींना ताब्यात घेतले. अधिक चौकशी केली असता आरोपींकडून १८५ विविध बँकाचे धनादेश, कर्ज काढण्यासाठी लागणारी कागदपत्रे, मोबाईल जप्त केले.

आरोपींकडे कोणताही परवाना नसताना नागरिकांना मोठ्या रकमेचे कर्ज देण्याचे आमिष ते दाखवत होते. कर्ज देण्याचा बहाणा करून लाखो रुपये ते प्रोसेसिंग फी व ऍडव्हान्स हप्त्याच्या नावाखाली पैसे घेऊन अनेकांची फसवणूक केल्याचे समोर आले आहे. अशाप्रकारे फसवणूक झाली असल्यास नागरिकांनी पिंपरी - चिंचवड गुन्हे शाखा युनिट चार येथे संपर्क साधावा, असे आवाहन पोलिसांनी केले आहे.