चिंचवड, ता. २८ ः इंदिरानगर येथील शिवलिंग नंदी मंदिर ट्रस्टतर्फे पहिल्या श्रावणी सोमवारनिमित्त महादेवाला पालखीत विराजमान करून पालखीची नगर प्रदक्षिणा मिरवणूक काढण्यात आली. यावेळी प्रत्येक घरासमोरील महिला पालखीला ओवाळतात. तसेच घरातील लहान मुलांना पालखीखाली झोपविण्याची परंपरा पाळली जाते.
इंदिरानगर येथील शिवलिंग नंदी मंदिर ट्रस्टतर्फे ३९ व्या वर्धापनदिनानिमित्त तसेच श्रावणातील पहिल्या सोमवारनिमित्त विविध धार्मिक व पारंपरिक कार्यक्रमांचे भव्य आयोजन करण्यात आले. मंदिराचा संपूर्ण परिसर विद्युत रोषणाई व फुलांच्या आकर्षक सजावटीने उजळून निघाला. पहाटे एक वाजता पंचामृत, गोड दूध, नारळ, हार-फुले, केशर, गुलाब, बेलपत्र वाहून रुद्राभिषेकास प्रारंभ झाला. या रुद्राभिषेकात सुमारे १०० महिला व पुरुष भाविकांनी सहभाग घेतला. रुद्राभिषेक पहाटे ४ वाजेपर्यंत अखंड चालू होता. सकाळी पुजारी गणेश टंकसाळे गुरुजी यांनी महादेवाच्या पिंडीवर विधिपूर्वक अभिषेक केला.
यानंतर सकाळी १० वाजता ट्रस्टचे अध्यक्ष भाऊसाहेब भोईर यांच्या हस्ते महादेवाला पालखीत विराजमान करून इंदिरानगर प्रवेशद्वारापासून पालखी मिरवणुकीस सुरुवात झाली. या मिरवणुकीत ट्रस्टचे पदाधिकाऱ्यांसह नागरिक सहभागी झाले. इंदिरानगर, भोईरनगर, दळवीनगर परिसरात नगर प्रदक्षिणेसाठी निघाली. ठिकठिकाणी महिलांनी रांगोळ्या काढून, फुलांची उधळण करून पालखीचे स्वागत केले.
वरदा भजनी मंडळाने भजनसेवा सादर केली. सायंकाळी ७ वाजता महाआरतीनंतर साधारणतः ७ ते ८ हजार भाविकांनी महाप्रसादाचा लाभ घेतला. जय शंकर भजनी मंडळाने कार्यक्रमाची सांगता झाली.

CWD25A01701