वडगाव मावळ, ता. २८ : मावळ तालुक्यातील महत्त्वाची धरणे या पूर्वीच भरली. तर, पावसाचा जोर पुन्हा वाढल्याने पवना, आंद्रा व वडिवळे या धरणांतून विसर्ग सुरू करण्यात आला आहे.
तालुक्यातील महत्त्वाच्या पवना धरणातून सध्या तीन हजार ६५०, नाणे मावळातील वडिवळे धरणातून पाच हजार २१६, तर आंदर मावळातील आंद्रा धरणातून दोन हजार ६१८ क्युसेकने विसर्ग रविवारी सुरू करण्यात आला. त्यामुळे ओढे-नाले व नद्या दुथडी भरून वाहत आहेत. विशेषत: इंद्रायणी, आंद्रा, पवना या नद्यांच्या पाणीपातळीत मोठी वाढ झाली आहे. पावसाच्या प्रमाणानुसार धरणातील पाणी विसर्ग कमी जास्त करण्यात येत आहे.
नदीपात्रात उतरू नये. नदीपात्रात जनावरे असल्यास तत्काळ सुरक्षित ठिकाणी नेण्यात यावीत. नदीकाठच्या नागरिकांनी आवश्यक दक्षता बाळगावी, असे आवाहन पुणे पाटबंधारे विभागाचे कार्यकारी अभियंता डी. एम.डुबल यांनी केले आहे.