पुणे : आयुर्वेद, सिद्ध, युनानी, होमियोपॅथी, नॅचरोपॅथी या शाखांच्या पदव्युत्तर पदवी अभ्यासक्रमासाठी अभिमत विद्यापीठांमध्ये प्रवेश घ्यायचा असेल, तर विद्यार्थ्यांना 50 हजार रुपये सुरक्षा अनामत (डिपॉझिट) रक्कम भरावी लागणार आहे. केंद्रीय आयुष मंत्रालयाने आज अचानक हा निर्णय जाहीर केल्याने विद्यार्थी हवालदिल झाले आहेत. 

राष्ट्रीय स्तरावरील कोट्यासाठी आयुष मंत्रालयाने वेळापत्रक जाहीर केले आहे. त्यानुसार नोंदणी, शुल्क भरणे आणि महाविद्यालयांचे पसंतीक्रम देणे या प्रक्रियेसाठी 16 ते 20 ऑगस्ट हा कालावधी दिला आहे. या काळात ज्या विद्यार्थ्यांना अभिमत विद्यापीठांमध्ये प्रवेश घ्यायचा असेल, तर खुल्या आणि मागास प्रवर्गासाठी नोंदणी शुल्क पाच हजार रुपये आणि सुरक्षा अनामत म्हणून 50 हजार रुपये रक्कम भरावी लागणार आहे. सरकारी आणि अनुदानित महाविद्यालयांसाठी केवळ दोन हजार रुपये नोंदणी शुल्क आणि दहा हजार रुपये सुरक्षा रक्कम भरावी लागणार आहे. 

आयुष मंत्रालयाने कोणतीही पूर्वसूचना न देता ही रक्कम भरण्यास सांगितल्याचे विद्यार्थ्यांचे म्हणणे आहे. याबद्दल योगेश कदम म्हणाले, "प्रवेशाच्या माहिती पत्रकात सुरक्षा रकमेबाबत काहीच उल्लेख नाही. ही रक्कम अचानक का घेतली जात आहे? आता ऐनवेळी एवढी मोठी रक्कम कुठून आणायची हा प्रश्‍नही आमच्यासमोर आहे. तसेच, ही रक्कम अनामत असेल तर ती मिळणार कधी, याबद्दल स्पष्टीकरण देण्यात आलेले नाही.'' 

पदव्युत्तर पदवी अभ्यासक्रमाच्या प्रवेशासाठी अर्ज करणाऱ्या विद्यार्थ्यांची संख्या मोठी असते. ही संख्या मर्यादित राहावी, यासाठी विद्यार्थ्यांवर सुरक्षा अनामत लादण्यात आली आहे. अनामत रक्कम अनेक विद्यार्थ्यांना भरता येणार नसल्याने विद्यार्थी संख्या मर्यादित ठेवून प्रवेशप्रक्रिया लवकर उरकण्याचाही केंद्र सरकारचा हेतू दिसतो, अशी टीका विद्यार्थी करीत आहेत. 

महाराष्ट्र स्तरावरील प्रवेशासाठी हे शुल्क नाही. राष्ट्रीय स्तरावरील कोट्यासाठी हे शुल्क दिलेले असेल, तर त्याचा निर्णय दिल्लीतील आयुष मंत्रालयातून झालेला असेल. राज्य स्तरावरून सुरक्षा रक्कम घेण्याबाबत कोणताही निर्णय झालेला नाही. 
- कुलदीपराज कोहली, संचालक (महाराष्ट्र), आयुष संचालनालय